Peter Bosold Kangiata Qimussersuanngorpoq: - Kiisami!
Qimussit 13-it Tasiilameersut, Kulusumeersut Tiilerilaameersullu Tasiilami sapaammi sukkaniummata Kulusummiu Peter Bosold ajugaavoq. Aqqutini imaannaanngissimaqisoq Sermitsiamut oqaluttuaraa.
Peter Bosold Kangiata Qimussersuanngorami nuannaarlunilu killitsisimaqaaq.
Assiliisoq: Axel G. Hansen
Peter Bosold sukkaniuteqatissanilu Tasiilami sikumiit ippassaq sapaammi ulloqeqqartoq aallartussanngoramik aqqaneq-marlunnik qimmeqartussaagaluarpoq.
Qimmit sukkaniutissai Tasiilamut pereerlutik pituussaarnermik kingorna parruttunut akuusimapput, taamaalilluni quliinnarnik qimmeqarluni sukkaniuteqataasussanngoriasaarpoq.
- Eqqarsaraluarpunga immaqa siullernut angummannaviarnanga, taakkua qimmit pitsaasut marluk ilaanngitsooramik, Peter oqaluttuarpoq.
Sunaaffali pisussaq aggersoq. Peter Qimussimik 2012-imi sukkaniuteqqaarpoq, naak ukiut tamaasa peqataasarnikuunngikkaluarluni, peqataaqqaarnerminit ukiut 14-it qaangiuttullu Kangiata Qimussersuanngorpoq.
- Qangarsuarli unammisartuullunga kiisami ajugaavunga.
Tasiilami sukkaniunnerup nalaani silageqaaq.
Assiliisoq: Mikael Kúnak
Tikilerneq killitsinnartoq
Kulusumi qimusserfiusartoq Tasiilami sukkaniuffigisaannut sanilliullugu allaanerujussuuvoq. Kulusumimi sikukkut maniinnartumi qimussernerusarput.
- Kisianni Tasiilami unammigaangatta qummut ammullu. Qimmit ilaatigut qasunarilaartarpaat, Peter oqaluttuarpoq.
Taannali kisimi unammillernartuunngilaq. Sukkaniuttunimi 13-iusuni pingasut qamutaajarput.
- Unammillernartoqalaartorujussuuvoq aqqutaa. Piterarnikuungaatsiarami aput tinginnikuulluni ujarassuaqartarlunilu ilaatigut. Uanga aamma marloriarlunga ajutuungajakkaluarpunga iluatseqqatartarlungali. Saarlisaapajaarlunga ujarassuarmut marloriarlunga apungajakkama. Aporsimasuuguma qamutikka sequmissimassagaluarput, Peter oqaluttuarpoq.
Qamutaajartut inuttai qujanartumik ajoqusersimanngillat. Aqqutaani ilungersuagaluarluni nalunaquttap akunneri marluk minutsillu 14-it ingerlaareerlugit apuuffissaminut nuiinnaqaaq.
- Tasiilap akianiit isiginnaartut nuigakkit qiiaammerujussuarlunga qiasunnguummertarpunga. Tikiliivillunga qialaarpunga, soorunami nuannaarnerup pianik.
Sungiusaalluarsimanini iluatsissimasoq qularinngilaa.
- Qimmit utoqqaanerulaarnerusortaasa ukiuni siuliini sungiusaassutikka eqqaamasimavaat, taakkua atorpakka.
Qanoq ilioravit?
- Tamakkua nammineq pigisarpagut, Peter Bosold illarlunilu oqarpoq.
Peter Kulusumut ullumi ataasinngornermi angerlamut apuukkami tikilluaqqulluarneqarpoq.
Assiliisoq: Nukappi Boassen Wille
Avannaata Qimussersuinut anngukkusuppoq
Kangiata Qimussersuata Tasiilamiit Kulusumut ullumi ataasinngornermi angerlamut apuukkami ajugaanini misigeqqippaa. Nunaqqatiminit sikup sinaanukaasimasunit tikilluaqquneqarpoq.
- Meeqqat, utoqqaat, inersimasut aappalaartulerlutik, allagartarsualisarlutik tikilluaqqusipput. Aamma qummoroortarlutillu seqqortaarlutik pipput. Nuanneq, Peter Kulusumut apuuteqqammerluni taama oqaluttuarpoq.
Kangiata Qimussersua ukiut tamaasa pisarpoq, tassanilu annguttut ukiut pingasukkaarlugit Avannaata Qimussersuinut peqataasarlutik. Avannaata Qimussersui, Qaanaamiit kujammut Sisiumiunut, aamma kangiani Ittoqqortoormiiniit Tasiilamut peqataasoqarlutik aappaagu unammissammata Peter anngukkusoqaaq.
- Qimmit utoqqaassusii pitsaassusiilu aaqqitsinniarsarivakka 2027-mut. Ilungersulaarusuppunga anngunnissamut, neriuppunga anngukkumaarlunga Peter Bosold naggasiilluni taama oqarpoq.
Qimussimik sukkaniunneq tulleq qilanaarineqaqisoq Avannaata Qimussersua Qasigiannguani arfininngorpat marsip 28-ani pissaaq.
