TIMERSORNEQ

Ataasiakkaarluni kinngusaqattaarluni unammersuarneq arfininngornermi juulip sisamaani ingerlanneqassasoq, Peqatigiiffik Qajaq Nuup unammersuarnermut pilersaarutaani atuarneqarsinnaavoq.

Assi: Leiff Josefsen

Qaannamik Unammersuarneq 2026

Nuna tamakkerlugu Nuummi qaannamik unammersuarneq ullumi pingasunngornermi juulip aallaqqaataani aallartippoq, unammersuarneq juulip qulingata tungaanut ingerlanneqassaaq, Peqatigiiffik Qajaq Nuuk aaqqissuisoralugu.

Masauna Peary Masauna Peary Journalist

Saqqummersinneqarpoq 1. Juuli 2026 - 12:06

Qaannamik Unammersuarneq (QU) 2026 Nuummi ullumi aallartimmat, Nuummiittut qajartortunik ulluni qulini tulliuttuni isiginnaagassaaleqissanngillat.

KNR TV-ip aallakaatitsinissamut pilersaarutaani sinerissamiittut isiginnaarutikkut qaannamik unammersuartunik KNR TV-ip aallakaatitsineratigut malinnaanissaminnut aamma periarfissaqassasut takuneqarsinnaavoq.

Qaannamik unammersuarneq aallarnerlugu ullumi pingasunngornermi nalunaaqutaq 09:30 katinngatilisaarluni ingerlaaqatigiittoqarpoq, nalunaaqutarlu 10:15 naalagiaqatigiittoqarluni. Inussivimmi qaannamik unammersuarneq nalunaaqutaq ataatsimut ammaanersioqassasoq, Peqatigiiffik Qajaq Nuuk allappoq.

Ussassaarut

Unammersuarnermi pilersaarutit

Unammersuarnermi pilersaarutit qimerluataaraanni, sisamanik ukiulinniit 99-it tikillugit ukiulinnik unammersuartitsineq ingerlanneqassasoq atuarneqarsinnaavoq.

Ulluni siullerni marlunni, tassa ullumi pingasunngornermi aqagulu sisamanngornermi illup iluani allunaariaqattaarnerit ingerlanneqassapput.

Immami timersorluni unammersuaarnerit tallimanngornermi juulip pingajuanni aallartinneqassapput.

Naatsumut parrunneq ullormi siullermi ingerlanneqassaaq, arfininngornermi ataasiakkaarluni kinngusaqattaartoqariarluni sapaammi maqittarlugu parruttoqassaaq, Peqatigiiffik Qajaq Nuuk allappoq.

Qajartullammassuit ataasinngornermi qasuersaariarlutik marlunngornermi juulip arfineq-aappaanni saaqqusersorlutik unammersuassapput, pingasunngornermi iligiikkaarlutik kinngusaqattaassallutik. Sisamanngornermi takisuumut parrunnersaarsuaqassalluni.

Unammersuarneq naggaserlugu tallimanngornermi juulip qulingalini iligiikkaarluni parrunneq ingerlanneqassaaq.

Siullullutik meeqqat sisamaniit qulingiluat tungaanut ukiullit nalunaaqutaq quliniit unammillutik aallartissapput, Peqatigiiffik Qajaq Nuuk pilersaarutimini allappoq.