– Aasianni aalisakkerivik siunissaqarnersoq qulakkeerneqanngilaq

Aasianni Polar Seafoodip aalisakkanik raajanillu tunisassiorfia matuneqariaannaasimasoq Naalakkersuisut sapaatip-akunnerani kingullermi iliuuseqarnerisigut annaanneqarsinnaasoq oqaatigissallugu suli siusippallaarpoq.

Bent Sallingip, aalisarnermik ingerlatseqatigiiffissuarmi Polar Seafood Greenlandimi pisortaanerup, tamanut ammasumik qisuariaqqaarnera taamatut oqaatigineqarsinnaavoq.

Naalakkersuisut Kitaani Tunumilu avataani qaleralittassiissutit saarullittassiissutillu aalisartunut soqutiginnittunut 2026-mi neqeroorutigineqassasut siunnersuuteqarput. Katillugit qalerallit 4.900 tonsit saarulliillu 5.000 tonsit pisassiissutigineqarput.

Naalakkersuisut siunnersuutaat pillugu Sermitsiap Bent Salling apersorpaa. Matumani ilaatigut paatsuugassaanngitsumik ima oqarpoq:

- Aasianni suliffissuaq siunissaqarnersoq qulakkeerneqanngilaq.

Salling: - Alloriarneq pitsaasoq

Naalakkersuisut ukioq manna Kitaani Tunumilu ingerlatseqatigiiffinnut soqutiginnittunut pisasseeqqinnermikkut Aasianni suliffiit qulakkeerneqarnissaat kissaatigaat. Tassa Polar Seafoodip aalisakkanik raajanillu tunisassiorfia matuneqariaannaasoq. Tunisassiorfiup ammaannarnissaa Naalakkersuisut pingaartippaat.

- Naalakkersuisut suliniuteqarnerat alloriarneruvoq pitsaasoq, aaqqiissutissamik suliaqarnissamut tunngavissaqarluarnerulersitsisoq. Tamannali tunisassiorfiup ammaannarnissaanut qulakkeerinninngilaq. Suliap ingerlateqqinnissaa pisassanillu agguaanissaq aalajangiisuussapput, suliffeqarfissuarmi pisortaq oqarpoq.

Tunisassiorfik ammaannassappat qaleralittassiissutit qanoq annertutigisumik ilaneqassappat?

- Maannakkut pisassiissutit qanoq amerlatiginissaat oqaaseqarfigerusunngilarput, taanna oqarpoq.

Naalakkersuisut aaqqiissutissaat piviusunngortinneqassappat Aasianni suliffiit qassit qulakkeerneqarsinnaappat?

- Tunisassiorfik 100-t sinnerlugit sulisoqarluni ukiuni arlalinni Aasianni suliffinni annersaasunut ilaanikuuvoq.

- Suliffiit amerlanerpaat attatiinnarnissaat Aasiannilu tunisassiornermik ingerlatsinerup ingerlaannarnissaa anguniagaraarput. Taamaammat matusinissaq akueriinnarnagu aaqqiissutissamik sulissutiginnippugut.

- Kisianni pisassiissutit agguataarneqarnerat aalisakkallu qanoq amerlatiginerat apeqqutaammata kisitsisit eqqoqqissaartut oqaatiginissaat suli siusippallaarpoq.

Polar Seafood Greenland pisassiissutinut taakkununnga marlunnut qinnuteqassava?

- Suli suliariumannittussarsiuussinermut tunngasut nalilersorpagut, taamaammallu maannakkut qinnuteqaatit imaluunniit suliariumannittussarsiuussinerni aalajangersimasuni peqataanerput oqaaseqarfigerusunngilarput.

Naalakkersuisut marlunnik siunnersuuteqarnerisigut Aasianni ingerlatsinerup tunisassiornerullu ingerlaannarnissaanut kissaatisi tamaasa pivisigit?

- Pisassiissutitut neqeroorutit nutaat marluk alloriarnerupput pitsaasut, tamatumali sunniutaasa ataatsimut isigalugit nalilernissaat suli siusippallaarpoq. Suliap ingerlateqqinnissaa angusallu aalajangersimasut apeqqutaapput.

- Matusinnginnissarput kissaatigiuaannarnikuuarput. Naalakkersuisut aalajangernerat pissutigalugu maannakkut aaqqiissutissamik suliffissuarmut siunissaqartitsisumik sulissutiginninnissamut periarfissaqarluartutut isigaarput.

- Kisianni sulissutigineqartut kingulliit inerneri siunissamilu tunisassiat tunngaviusut ilisimatinnagit aalajangersimasumik neriorsuisinnaanngilagut.

- Aasianni tunisassiornerup suliffiillu aningaasaqarnikkut aalisagaqassutsikkullu piujuartitsisumik tunngaveqarluni attatiinnarnissaat anguniagariuarsinnarparput, taanna oqarpoq.

Polar Seafoodip ingerlalluartumik ingerlatsiinnarnissani kisiat kissaatiginagu aammali nunaqavissut suliffissaqartikkumallugillu, nunatsinni illoqarfiit ineriartortinneqarnissaannut peqataaniarlutillu aalisarnermi naleqalersitsinerup sapinngisamik Kalaallit Nunaanniiginnarnissaata qulakkeernissaa kissaatigaa.

- Taamaammat aningaasatigut akisussaaffeqartumik piffissarlu ungasinnerusoq eqqarsaatigalugu piujuartitsisumik aaqqiissuteqarnissamik sulissuteqarpugut, Bent Salling oqarpoq.

Akerliussutsimik takutitsinerit

Bent Sallingip Polar Raajat piginnittut, Polar Seafood Greenland aamma Polar Seafood Denmark sinnerlugit qaammatit tallimat matuma siornatigut Polar Raajat Aasianni tunisassiorfiata matuneqarnissaanik nalunaaruteqarmalli illoqarfik politikkikkut inuussutissarsiornikkullu pissanganartumik qitiusimavoq.

Tunisassiorfik ingerlaannassappat politikkikkut aaqqiissuteqartoqartariaqartoq, tassa Naalakkersuisut ikiuuttariaqartut Sallingip qangali erseqqissarsimavaa.

Inuussutissarsiuteqartut innuttaasullu Aasianni tunisassiorfiup matuneqarnissaanut akerliusut arlaleriarlutik akerliussutsimik takutitsisarlutillu ataatsimiittarsimapput.

Peter Borgip nalunaarutai

Inatsisartut aalisarnermut ataatsimiititaliaat Aasianni tunisassiorfik pillugu Nuummi arlaleriarluni ataatsimiittarsimavoq. Ilaatigut ataatsimiititaliami ilaasortat Ane Hansen, IA aamma Jens NapãtôK’, Naleraq, suliffiit annaanneqarnissaat suliffeqarfiullu matunnginnissaa anguniarlugu ilungersorput. Ataatsimiititaliap Naalakkersuisut, minnerunngitsumillu ilaatigut aalisarnermut naalakkersuisoq Peter Borg, Demokraatit, Aasianni tunisassiorfimmi tunisassiorneq ingerlaannaqqullugu kimigiiserfigisimavaat.

Peter Borg Polarip tunisassiorfimmik matusinissamik februaarimi nalunaaruteqareernerata kingorna Kalaallit Nunaanni aalisakkerivinnik ingerlatsisut annerit marluk, namminersortut Polar Seafood aamma Namminersorlutik Oqartussat pigisaat Royal Greenland, aaqqiissutissarsisariaqartut aallaqqaammulli nalunaarpoq.

Nalunaarutai Namminersorlutit Oqartussanit ikiuunnissamik sunnguamilluunniit imaqanngillat. Suliffeqarfiilli taakku marluk isumaqatiginninniarnertik iluatsinngitsoorpaat, tunisassiorfillu annaanniarlugu aaqqiissuteqarsinnaanatik.

Polarimi pisortaq Bent Salling naapertorlugu Royal Greenlandimi pisortaaneq Toke Binzer Polar Seafood isumaqatigiinniaqqikkusukkunnaartoq oqarmat isumaqatigiinniarnerit ajalusoortinneqarput.