Piviusulersaarut “SILA” nunani tamalaani nersornaaserneqartoq

Rakel Sanímuinaq, piviusulersaarummi “SILA”-mi ilisimasanik ingerlatitseqqiisutut angakkutullu inuttaasoq, filmi sinnerlugu Ray of Light Awards 2026-mi Gaia-p nersornaasiuttagaanik tunineqarpoq.

Gaiap nersornaasiuttagaa nunat tamalaat akornanni filminut pinngortitamik, ilisimassutsimik, inunnullu nunarsuarmut uumassusilimmut attuumassuteqartunut filmiliarineqarsimasunut nersornaataavoq.

- Maluginiakkanni sakkortunerpaaq tassaavoq oqaluttuat ilisimasallu uanga aallaavigisama takuneqarnerini akuerineqarnerinilu qujamasungaarnera, Rakel Sanímuinaq nersornaasiineq pillugu AG-mut oqarpoq.

Zaya Benazomit Maurizio Benazomit ilitsersorneqartumi silap isumaa - silamut, ilisimassusermut anersaallu inuunermut attaveqalersitsisoq ilisimasassarsiorfigineqarpoq.

Rakel Sanímuinap nersornaaserneqarneq inuttut angusaminut attuumassuteqartinngilaa, ilisimasalli oqaluttuallu nuannaarutigineqarnerannut attuumassuteqartippaa.

- Uanga kinguaariinni kingornuttakkat, ilisimassutsimik tamatuminnga kingornussisutut ingerlatitseqqiisutut inuttut maaniippunga. Uannuinnaq tunnganngilaq, siulivut kinguaaasavullu pineqarput.

Rakel Sanímuinaap inuit nunanit tamalaaneersut siuaasami inuunermik inunnillu paasinninnerannut akuerinnittut takuneqarsinnaanerat killitsinnarinerpaavaa.

- Meeraallunga ilisimasat taama ittut silarsuarmi nutaaliaasumi inissaqanngitsut ilisimatinneqarpunga. Nunat tamalaat akornanni isiginnaartarfimmi nikorfalluni ataqqineqarneq misigalugu killitsinnarpoq, oqarpoq.

Filmimi, Science and Nondualitymit suliarineqarpoq, inuit pinngortitamik anersaarsiornikkullu pingaartitaqartut imminnut qanoq attuumassuteqarnerat, misissorlugu nunap inoqqaavi assigiinngitsunik ileqqutoqqanik ingerlatsisut ajorunnaarsitsisartut ilisimassusermillu ingerlatitseqqiisartut oqaluttuarineqarput.

Rakel Sanímuinap filmimi oqariartuut silarsuarmut tamanut tunngasoq upperaa.

- “SILA” Kalaallit Nunaat pillugu oqaluttuaannaanngilaq. Nunap inoqqaavi, nunasiaanerup kingunipilui, inuillu kulturiminnut ilisimasaminnullu uterniarnerat pillugit oqaluttuarineqartup imarisaata annersaraat, Rakel Sanímuinaq oqarpoq.

Filmi inuit nunallu inoqqaavisa ilisimasaannik silarsuarmi tamarmi paasinninnerulersitsissasoq, taassuma neriuutigaa.

- Neriuppunga inuit ilisimasat tamakku alapernaassuseqarlutik ataqqinnillutillu tiguassagaat, nunallu inoqqaavi namminneq oqaaseqarsinnaatillugit. Suliara inuit ilisimassusaannik nunallu inoqqaavisa silarsuarmut tunissutaannik paasinninnerulernissamut matumik ammaassippat, tamanna neriugisinnaasannit tamanit annerpaassaaq, Rakel Sanímuinaq oqarpoq.

“SILA” juulimi takuteqqaarneqassaaq.