Erinniortumut
Arnannguaq Gerstrømimut sapaatip akunnerata naanera nuannersuuvoq. Dansk
Komponistforeningip erinniortunut legatinnattaaritittagaanut tallimaasunut, Nye
Veje-mik taaneqartunut, ilaatinneqarluni tallimanngornermi ualikkut
ilisimatinneqarpoq.
Arnannguaq
Gerstrømip legati 100.000 koruuninik aningaasartaqartoq nipilersornermik
ilisimatusarnermut atorniarpaa.
Erinniortumut
Arnannguaq Gerstrømimut sapaatip akunnerata naanera nuannersuuvoq. Dansk
Komponistforeningip erinniortunut legatinnattaaritittagaanut tallimaasunut, Nye
Veje-mik taaneqartunut, ilaatinneqarluni tallimanngornermi ualikkut
ilisimatinneqarpoq.
Arnannguaq
Gerstrømip legati 100.000 koruuninik aningaasartaqartoq nipilersornermik
ilisimatusarnermut atorniarpaa.
-
Aallussisartorpalaalaarpoq, taamaattorli suliniutinnut ”sammisamut
annikitsumik” taasannut piffissaqalerlungalu itisilerisinnaalernera
pingaaruteqaqaaq. Naatsumik oqaatigalugu misissorniarakkit pinngortitami
aalanerit, soorlu mallit - nammineq nipinngortitanni qanoq
nipilersuganngortissinnaanerlugit, Arnannguaq Gerstrøm nassuiaavoq.
- Erinniortutut
suliassanik inniminniissutigineqartunik suliassaqarnarnerusarami, tamakkulu
nipilersukkanik aalajangersimasunik naammassisaqarfiusussaasarlutik. Matumani
naammassiniagassatut piumasaqaatitaqanngitsumik itisilerinissannut
periarfissaqalerpunga.
- Legatimik
tunineqarninnut atatillugu tatigineqarninnik takutitsineq qujamasuutigeqaara.
Pinngortitami rytme eqqissisimasoq, akerleriit annertoorujussuit, aamma
Kalaallit Nunaanni Danmarkimilu sorlaqarfikka nipilersortarninnut
tunngaviupput, taakkualu itinerusumik misissornissaannut piffissaqalerlungalu
inissaqartitsilernera tunissutaavoq angisoorujussuaq.
Nipilersornermik
inuussutissarsiutilik
Arnannguaq
Gerstrøm Nunatsinni inunngorpoq peroriartorlunilu, aamma Ilulissani Nuummilu
najugaqarsimalluni. Danmarkimi, Sverigemi Tuluit Nunaannilu nipilersornermik
ilinniarfissuarni ilinniartuusarsimavoq.
Ilinniarnini
naammassigamiuk Nunatsinnut uterpoq, ukiorpassuarnilu nipilersoqatigiinni
erinarsoqatigiinnilu aqutsisuusarluni, aamma Nunatsinni
nipilersoqatigiissuarnik siullernik pilersitseqataasimalluni. 2009-miilli Nunatsinni nunanilu allani nipilersoqatigiit,
nipilersoqatigiissuit erinarsoqatigiillu nuutinik nipilersugassiortarpai,
tamakkulu saniatigut nipilersortartut assigiinngitsut suleqatigisarlugit.
Ullutsinni
Danmarkimi angerlarsimaffeqarluni erinniortartutut, erinarsoqatigiinnik
aqutsisutut qarlortartartutullu kisimiillutik nipilersortartunit,
erinarsoqatigiinnit nipilersoqatigiinnillu nunarsuarmi tamarmeersunit
nuutilersorluni nipilersugassanik suliassinneqartarpoq. Nuutilersorluni
nipilersugassanik suliaqarnerusarpoq, tamakku annerusumik
nipilersoqatigiissuarnit, erinarsoqatigiinnit aamma erinarsoqatigiinnit
inuttakinnerusunit atorneqarnerusarlutik.
Erinarsoqatigiinni
Roskilde Domkirkes Pigekorini erinniaminik siullermeerluni qanittukkut
tusarnaartitsivoq, erinniaminillu allamik tusarnaartitsinissaa tulliuttoq
tassaalluni DR-imi suliniummut atatillugu Danmarks Underholdningsorkesterinit
februaarip 21-anni tusarnaartitsissutigineqassalluni.
