Soorlu planetimut allamut pilluni

Margrethe Løvstrømimut Uummannami najugalimmut, seqernup kingumut nueqqittalernera pilluarnartoq nukissanillu tunisisoq AG-mut oqaluttuaraa.

- Seqernup qinnguaasa uanga illoqarfiga Nasiffissuaq (Uummannap illoqarfiata ilaa aaqq.) nuingaat assorujussuaq qamuuna pilluaammertarpunga, Margrethe oqarpoq.

Ullut 77-it, tassa novemberip 19-ianiilli seqernup Uummannaq nuisimanagu kingumut februarip ulluisa sisamaanni angoqqippaa.

Seqineq sila pissutigalugu Uummannamut februaarip arfineq-aappaanni aatsaat nuisimavoq, Margrethe nassuiaavoq.

- Soorluli manna nunannguarput planetimut allamut pisoq, tassaniiginnaraluarluta. Nukissarujussuarmik soorlu tunineqartunga. Soorlu suut suliassat tamaasa saperunnaarlugit, Margrethe Løvstrøm nipini qiimmaallatsillugu oqaluttuarpoq.

Seqernup nuisaleraangami inunnut qiimmaallaataasarnera aamma pilluarnarnarnera inuit akornanni eqqartorneqalertartoq kiisalu inuunerup qanoq oqitsigineranik eqqaasitsisartoq Margrethep oqaluttuaraa.

- Allaalluunniit immaqa soorlu kiserliorpallaarunnaarluta soorlu taamannak, uanga meerannguakka tinginikuugamik allamiillutik tamarmik, assorujussuaq qamuuna toqqissiallappunga seqineq nuimmat, Margrethe oqilisimaarpasilluni oqaluttuarpoq.