Tivolimi nalliuttorsiornerup kingorna isornartorsiuisoqartoq

Tivolimi Kalaallit naapeqatigiittarnerisa ukiunik 50-inngortorsiorneranik ilisimasallip AG saaffigalugu kalaallit nipilersortartut aaqqissuussinermi atugaat isornartorsiorpai.

Taassuma kinaassutsini isertuukkusuppaa, AG-miilli ilisimaneqarpoq, ilaatigullu nipilersortartut Københavnimiinneranni angallannermut nerisassanullu aningaasartuutit tikkuarpai. Taassumattaaq nipilersortartut peqataasut arlallit akissarsiassatik suli tigusimanngikkaat ilisimatitsissutigaa.

Ib Uldum Kalaallit naapeqatigiittarnerannut aqutsisunut ilaavoq, ilaatigullu akissarsiat, angalanerit, nerisassat unnuisarfissallu pillugit isumaqatigiissutinik nipilersortartunik ataasiakkaanik isumaqatiginninniarnermik akisussaaffeqarluni.

Taassuma isumaqatigiissutit ataasiakkaarlugit isumaqatigiissutigineqartartut, nipilersortartunullu piumasaqaatit ilisimareerneqartartut erseqqissarpaa.

- Piumasaqaatit ammasumik saqqummiunneqarput. Nipilersortartut ataasiakkaat isumaqatiginninniarfigisimavakka, tamarmillu isumaqatigiissut suna akuerinerlugu nalunngilaat, Ib Uldum, nipilersoqatigiinni DDR-imi aamma bassertuusoq, oqarpoq.

Angallanneq nammineq akilerneqartussaavoqAngalaneq nammineq akileraat

Nipilersoqatigiinni ilaasortat kalaallillu nipilersortartut ilaat allat Fieldsip eqqaani Cabinn Metromi najugaqartinneqarsimasut AG-mut saaffiginninnermi allassimavoq. Tassanngaanniit nipilerinermut tusarnaartitsinermullu atatillugu metromik Tivolimukarlutillu uternissartik namminneq akilertariaqarsimavaat. Akunnittarfiup eqqaaniit Tivolimukarnissamut metromik bilitsi ataasiinnaq 30 koruunip missaani akeqarpoq.

Aaqqissuisut angalaneq tamanna akilersimanngikkaat Ib Uldumip uppernarsarpaa. Aaqqissuisulli suut akilissagaat nipilersortartullu namminneq suut akilissaneraat isumaqatigiissutini allassimasimasoq oqarpoq.

Nipilersoqataasussat tamarmik assigiimmik isumaqatigiissuteqanngillat. Aningaasarsiassallu aamma angalanermut, nerisassanut unnuiffissamullu tunngasut nipilersortartunut ataasiakkaanut isumaqatigiissutigineqarput, taamaammat atugassarititaasut assigiinngiiaarsinnaapput.

Aamma nerisassanut aningaasartuutit isornartorsiorneqarput. Nerisassanullu akiliutinut uppernarsaatit atorneqarpallaasimannginnerat Ib Uldumip uggoraa.

- Kissaatigisatsitut atorneqartigisimanngitsut kingornatigut paasivarput. Taamaammat isornartorsiuineq tamanna paasisinnaanngilara, taanna oqarpoq.

Nipilersortartut ilaat ullormut aningaasarsiaqarniarsimasut, tigusimagaallu Ib Uldumip aamma oqaatigaa. Tassanittaaq isumaqatigiissutit peqataasunut ataasiakkaanut isumaqatigiissutgineqaramik assigiinngissuteqarput.

Arlallit akissarsiniarlutik utaqqisut

Kinaassutsiminik isertuussilluni saaffiginninneq apeqqutinik allanik aamma pilersitsivoq: nipilersortartut akissarsisinneqartarnerat.

Nipilersoqataasussat arlallit suli akissarsiassatik tigusimanngikkaat taanna AG-mut oqarpoq. Ib Uldum naapertorlugu aningaasat septembarip aallaqqaataani tunniunneqartussaagaluarput.

Ib Uldumip akissarsiat tunniunneqartarnerat akisussaaffiginngilaa. Isumaqatigiissutit isumaqatigiinniutigisarpai, akissarsiallu tunniunneqartarnerat Kim Falck-Petersenip, Tivolimi Kalaallit naapeqatigiittarnerannik aaqqissuussinermut aqutsisoqatigiinni siulittaasup, akisussaaffigaa.

AG-p nipilersortartut arlallit suli akissarsiaminnik pissarsisimanersut, sooq aningaasat tunniunneqarsimannginnersut qaqugulu pissarsinissaat naatsorsuutigisinnaaneraat paasiniarlugu Kim Falck-Petersen attaveqarfigaa.

Oqaaseqartinneqarsinnaasimanngilaq. Kim Falck-Petersen maanna napparsimasoq Kalaallit Nunaata Sinniisoqarfianiit AG-mut ilisimatitsissutigineqarpoq.