Ukiuni 13-ni sulereerluni inuulluaqqusisoq 

Erni Kristiansen, ukiuni 13-ini KRK-INUA-mi suliniutinut aqutsisuusimasoq malunnaateqarluartorlu, maanna NunaFondenimi suleqatigiinneq ineriartortitsinerlu pillugit siunnersortitut atorfittaarluni inuulluaqqusivoq.

- KRK-Inua-mi ukiuni pingasuni kajumissutsimik sulisartutut kingornalu ukiuni qulingajanni suliniummik aqutsisutut suleqataasimanera inuiaqatigiinnut inunnullu isiginnittaatsinnut sunniuteqangaarpoq, 37-nik ukiulik Erni Kristiansen oqarpoq nangillunilu:

- Inuusuttut sammineqaraangata inersimasutut inuusuttunik inissaqartitsinerunissarput qanoq pingaaruteqartigisoq ukiut ingerlaneranni paasivara. Inuusuttut isumassarsiarpassuaqarput, ajunngitsunik ajornerusunillu, suliassarpullu pingaarnerpaaq tassaavoq taakkua ammasumik inuiaqatigiit, namminneq inuunertillu pillugit oqaloqatigisarsinnaaniassammatigik toqqissisimanartumik inissisimaffeqalersitsinissaq. Uagut inersimasut tusarnaaqqissaartarutta oqaatsigut iliuutsitsillu puigorsimasagut sukkasuumik paasissavagut, suliniummi aqutsisoq soraartoq ilumoorluni oqarpoq, taassumalu inuusuttut ullumikkut piginnaasaqangaartut takusinnaavaa.

- Siunissami periarfissat kisiisa eqqarsaatigineqanngillat; ukiorpassuarni inuusuttunut sammisassanik pilersaarusiortoqaraangat, ingerlatsisoqaraangat nalilersuisoqaraangallu sunik naammassisaqarsinnaanersut takusarpara. Inuusuttut peqatigalugit, qalliinnarnagit sinaakkutissanik pilersitsinissaq pineqarpoq.

Erni Kristiansenip inuusuttut isumakuluutiginngilai. Illuatungianilli.

- Siunissaq inuusuttut inersimasullu ataatsimoorlutik pilersitassaat qilanaareqaara. Tamanna inunnut isiginnittaasimik tunngaviulluinnartumik pissarsiffigalugulu allannguutit annerpaat naqqaniit ataatsimoorlunilu pilersinneqartarnissaannik upperinnilersitsisoraara, taanna oqarpoq.