Borgmester Avaaraq Olsen (IA) kommunit aningaasaqarneranni inuillu amerlassusaasa assigiinngissutaat pillugit oqallinnermut qisuariarpoq, taannalu Inatsisartunut ilaasortap Anders Olsenip (S) paragraf 37 naapertorlugu apeqquteqaatai tunngavigalugit ilaatigut ima oqaasertalerlugu saqqummiunneqarpoq: “Kommunit aningaasaqarnikkut naligiinnginnerujussuat isiginngitsuusaarneqaannarsinnaajunnaarpoq.”
Anders Olsenip (S) Qeqqatalu Kommuniani borgmesterip Malik Berthelsenip (S) Nuup avataani kommunit ineriartortinneqarnissaannut politikkikkut erseqqinnerusumik – ilaatigut Namminersorlutik Oqartussat suliffeqarfiutaat sinerissamut nuunneqarnissaat aqqutigalugu - pingaarnersiuisoqarnissaa ujartorpaat.
Borgmester Avaaraq Olsen (IA) kommunit aningaasaqarneranni inuillu amerlassusaasa assigiinngissutaat pillugit oqallinnermut qisuariarpoq, taannalu Inatsisartunut ilaasortap Anders Olsenip (S) paragraf 37 naapertorlugu apeqquteqaatai tunngavigalugit ilaatigut ima oqaasertalerlugu saqqummiunneqarpoq: “Kommunit aningaasaqarnikkut naligiinnginnerujussuat isiginngitsuusaarneqaannarsinnaajunnaarpoq.”
Anders Olsenip (S) Qeqqatalu Kommuniani borgmesterip Malik Berthelsenip (S) Nuup avataani kommunit ineriartortinneqarnissaannut politikkikkut erseqqinnerusumik – ilaatigut Namminersorlutik Oqartussat suliffeqarfiutaat sinerissamut nuunneqarnissaat aqqutigalugu - pingaarnersiuisoqarnissaa ujartorpaat.
Avaaraq Olsenili naapertorlugu Kommuneqarfik Sermersuup sinneqartoorutai sanaartornerillu amerlasuut tunngavigalugit naligiinnginneq isigigaanni tamanna ajornanngippallaarpoq.
- Aningaasaqarnermut Naalakkersuisoqarfimmit soorlu oqaatigineqartoq, kommunini aningaasaqarnikkut naligiinnginneq assigiinngitsorpassuartigut naatsorsorneqarsinnaavoq. Ataasiinnarmik periuseqanngilaq naliliinermilu suut piumasaqaatit tunngavissatut toqqarneqarnersut apeqqutaalluinnarput, Avaaraq Olsen (IA) oqarpoq, Aningaasaqarnermullu Naalakkersuisoqarfiup nammineq naliliineranut innersuussilluni.
Ataasiartumik annertuumik sunniuteqartoqarnera sanaartornermut aningaasartuutit qaffasinnerannut pissutaasoq
Kommuneqarfik Sermersooq ukiuni tallimani ingerlatsinermigut katillugu 1,9 milliarder koruuninik sinneqartoorsimasoq sanaartornermullu aningaasartuutit kommuninit allanit qaffasinnerujussuusimasut Aningaasaqarnermut naalakkersuisup paragraf 37 naapertorlugu kommunit aningaasaqarnerat inuillu amerlassusaat pillugit Anders Olsenimut akissutaani erserpoq.
Borgmesterili naapertorlugu pisimasoq aalajangersimasoq sivikitsuinnarmillu atuuttoq pissutaanerpaavoq.
– Kisitsisit nikinganerujussui kommunimit 2022-mi Nuuk City Developmentimik tigusinermik nassuiarneqarsinnaapput. Tamanna sanaartornermut ataasiartumik annertuumik sunniuteqarpoq, tassa kommunimit atuarfik nutaaq, ulluunerani paaqqinnittarfiit illuutillu allat suliffeqarfimmiit pisiarineqartariaqarsimammata aningaasartuutillu taarsigassarsinikkut aningaasaliiffigineqartariaqarsimammata, Avaaraq Olsen nassuiaavoq.
Tigusinermut tamatumunnga iluarseereernerup kingorna Sermersuumit innuttaasumut ataatsimut sanaartornermut aningaasartuutigineqartut kommunit sinnerisulli qaffasissuseqarput.
- Tamatumani ersarissarneqarpoq, naatsorsuutini kisitsisit tamarmiusut kisiisa aallaavigalugit annertunerusumik inerniliineq sooq eqqunngitsumik takutitsisinnaasoq, taanna oqarpoq.
Annertuumik nalimmassaasoqartartoq – aaqqissuussinerli ajornakusoorlunilu ersarissuunngitsoq
Aammattaaq borgmesterip kommunit akornanni piviusumik aningaasatigut nalimmassaasoqanngitsutut isikkoqalersitsisinnaaneran eqqortuujnnginnerarpaa — isumaqarluni oqallinnermi taamatut isummertoqarsinnaasoq.
Ullumikkut annertuumik nalimmassaasoqartarpoq – aaqqissuussinerli ajornakusoorpoq ajoraluartumillu ersarissuunani, taanna oqarpoq.
Ataatsimoortumik tapiissutit aqqutigalugit Kommuneqarfik Sermersuumit kommunit sinnerinut ukiumut 90 mio. koruunit missaanniittut agguataarneqartartut ilaatigut tikkuapraa. Sermersooq nunatsinni innuttaasut 43 procentiisa missaanniittunik innuttaqarpoq kisianni ataatsimoortumik tapiissutit 38 procentiinnai tiguneqartarput, innuttaasut katitigaaneri aamma pilersuisussaatitaanermut artukkerneqarnerup eqqarsaatigineqarneri pissutaallutik.
Taakkua saniatigut naligiissaarinermik aaqqissuussinikkut agguataarisoqaqqittarpoq, tassani Sermersuumit inuit akileraarutaannit 113 mio. koruunit missaanniittut kommuninut allanut agguataarneqartarlutik. Taamatuttaaq Sermersuumi innuttaasut kommunini ataatsimoorussamik akileraarutitigut nalimmassaanermut akiliisarput, taakkua 400 mio. koruunit missaannut missiliuussinnaavagut kisiannili aaqqissuussamiit taamaallaat 80 mio. koruunit missaanniittut utertinneqartarput.
– Nalimmassaasarnermut pioreersumut taakkua assersuutit ilagiinnarpaat, Avaaraq Olsen oqarpoq.
Eqiterineq nuna tamakkerlugu politikkimut tunngasoq
Anders Olsenip (S) ilaatigut Naalakkersuisut kommunini allani ineriartortitsinnginnerarlugit aamma Nuummi qitiusumik aqutsineq annertuallaartoq isornartorsiorpai, Royal Greenlandip allaffeqarfia Issittumilu Sakkutooqarfik Nuummiittut tikkuarlugit. Qeqqata Kommuniani borgmesterimit Malik Berthelsenimit (S) tapersersorneqarpoq, taassumalu illoqarfiit pingaarnersaanniinnaq inuulluarsinnaasoqarsinnaasoq „uppertinneqartarneq“ mianersoqqussutigaa.
Avaaraq Olsenili naapertorlugu eqiterineq kommunit namminneq aaqqissinnaanngilaat.
- Suliffeqarfiit, ilinniartitaanermut neqeroorutit aamma inuiaqatigiinni suliffiit pingaarutillit inissiineq pillugit nuna tamakkerlugu politikkikkut pingaarnersiuinermut attuumassuteqarluinnarpoq, taanna oqarpoq.
Aningaasaqarnermut Siunnersuisoqatigiit siulittaasuata Torben M. Andersenip oqallinneq pingaaruteqarnerarlugulu nuna tamakkerlugu qanoq ineriartortitsisoqassanersoq Naalakkersuisut politikkikkut isummertariaqartut erseqqissarpaa.
Kommunit aaqqissuusseqqinneqarnissaat qilanaarineqartoq
Politikkikkut suliniutit aallartitereersut Avaaraq Olsenip tikkuarpaa. Pissutsit naligiinnerunissaat anguniarlugu kommunit akornanni aningaasatigut naligiissaarinerup nalilersorneqarnissaa Kommunit aaqqissuusseqqinneqarneranni naatsorsuutigineqartoq 2026-mut aningaasanut inatsisissami allassimavoq.
– Suliaavoq Kommuneqarfik Sermersuumit peqataaffigineqarnissamut qilanaarineqartoq – peqataasunik tamanik pissarsiaqarfiusumik oqaloqateqarnikkut aamma paasissutissartalimmik ersarissumillu tunngaveqartumik, borgmesteri oqarpoq.
Naggataatigut ersarissumik kajumissaarivoq:
– Kommunini aningaasaqarnikkut atugassarititaasut pillugit oqaloqatigiinneq ingerlateqqikkusuppara: Paasissutissalli qaqinneqartariaqarput, Kommuneqarfik Sermersuup kommunillu sinnerisa inissisimanerat pillugu tamakkiisumik takutitsinngitsumik pisariitsumik saqqummiinermik oqallinneq tunngaveqassanngimmat.
