Avataarsualiartaaterujussuaq satellittinik nunarsuarmik kaaviiartussanik imalik aallartinneqartoq

Avataarsualiartaatip Starshipip, SpaceX-imit sananeqartup, perngaammik nunarsuup avataarsuarnut ataasinngornermi ualikkut qangattartinneqarpoq.

Avataarsualiartaat, avataarsualiartaatit sananeqarsimasut annersaat nalunaaquttap-akunneranut 26.300 kilometerinik sukkassuseqarluni, Texasimiit aallartinneqarpoq. Nunarsuullu avataanut ingerlatinneqarluni.

Nutaarsiassaqartitsivik AFP taama allappoq.

Tamanna Starshipip misiliutitut 14-issaanik qangattartinneqarneratut oqaatigineqarsinnaavoq.

Avataarsualiartaatip inuttaqanngitsup avataarsuannut pinerata kinguninngua satellitsit, Starlink 26-it avataarsuanut avalakaatinneqarput.

Avataarsualiartaatip motooriata aappaa qamissimagaluartoq taama pisoqarpoq.

Motorit ilaat atorsinnaajunnaarmat SpaceX-imi oqaaseqartartoq nalunaarpoq avataarsualiartaat nunarsuup avataanut ingerlatitseqqissinnaanngitsoq.

Taamatulli naliliineq sivitsunngitsoq allanngortinneqarpoq.

Satellitsit Starlink atorlugit nunarsuaq tamakkerlugu nittartakkamik atuisoqarsinnaalerpoq.

USA-p avataarsuanut tunngasunik ingerlatsiviata, Nasap, pisortaata Starshipip aallartinneqarnera nittartakkatigut inuit attaveqaqatigiittarfiani X-mi nersualaarpaa.

- SpaceX pilluarit, avataarsualiartaat qilammut ingerlatillugu aallartitsilluarputit, tamatigullu isumannaatsumik akisussaassuseqartumillu isumassarsiorfigineqarsinnaasumillu iliuuseqarputit NASA-mi pisortaq Jared Isaacman allappoq.

- Nasap soqutigisaqatigiillu allat ikiuinissartik qilanaaraat, aamma Starship-it angalasarnerisa nalinginnaanerulernissaat qilanaaraa!

Avataarsualiartaatip qaava 26 minutsit qaangiunnerani, avataarsualiartaatip amusartuanit anillappoq.

Misiliilluni qangattartitsineq nalunaaquttap-akunnerini qulini ingerlasussaagaluarpoq, piffissamilu tassani avataarsuani nunarsuaq arfinileriarlugu kaajallallugu angalasussaagaluarpoq.

Misissuereernermili SpaceX-imit paasineqarpoq avataarsualiartaat nunarsuarmut siusinnerusukkut utertariaqartoq, CNN naapertorlugu suliffeqarfiup oqaaseqartartua taama oqarpoq.

Pilersaarut malillugu Manerassuarmut avataarsualiartaat avataarsuaneereerluni akunnerit pingasut missiliorlugit qaangiuppata missaaq, tamannalu pissaaq nalunaaqutaq arfernup missaani.

Avataarsualiartaatip qangattartaataata ilaa avataarsualiartaammiit Mexicop Kangerliumarngani avissaarluni nakkarpoq.

Starship avataarsualiartaat ukiuni arlalinni ineriartortineqareerluni, siullermeerluni 2023-mi aallartinneqarpoq.

Milliardærip niuertullu Elon Muskip SpaceX, Starshipip saniatigut aamma satellitsinik Starlink-inik tunisassiortoq, pilersippaa.

RITZAU