Ilaquttat, siku kingornussallu: Havighivimmi piniartutut inuuneq allanngoriartortoq

Upernaaq 2025.

Ilaqutariit Kristensenikkut qimussimik aallarput. Qimussit arlaliupput, Olennguaq Kristensenillu ernera nammineerluni ingerlaarpoq. Anguniagaa ersarippoq: appaliarsunniartussaapput.

Savissivimmiippugut – tamaanilu, siku naalagaavoq.

Nunaqarfik najugaqartunit Havighivimmik allanneqartarpoq – taakku ukiup aallartinnerani 48-sut – Qaanaap kujataaniipput, Qimusseriarsuup avannaata kitaata tungaani.

Olennguup nulii Naduk aappariillu ernutaat ingerlaqatigai. Bambusit takisuut arlallit qamutiniipput. Bambusillu isuini tamani Olennguup qassutai ipput. Appaliarsunniartoqartussaavoq. Timmissat ikilertitinnginnissaat pingaarpoq, aallaaneqarnerminnimi ikeqalersarput, appaliarsuimmi aanaarsimanngikkaangamik mamarnerusarput.

Olennguaq Kristensen appaliarsukkaangami tinginnginniassammata suluisigut noqittarpai. Qatiatigut toortapaa, taamaalillunilu uummataa kaanngartittarlugu. Tassa taama Avanersuarmi appaliarsunniartarput. Periuseq kinguaariinni ingerlaqqittartoq. Tamanna Olennguup ilitsoqqussarinngilaa, Savissivimmili ilikkagaraa.

Ilaqutariit appaliarsuppassuarnik pisaqarsimallutik angerlarput, utimullu aqqutaani nannunik nasissallutik aalajangerlutik. Nannup tumai siumorpaat. Nanoq qanittumiittoq Olennguaq eqqarsarpoq.

”Atagu pikunngarluta Facebookimi arlaata takusimaneraa takutigu”, Olennguaq oqarpoq.

Attaveqarniarnerli ajornakusoorpoq. Taamaammat nuliata panni sianerfigalugu nannuttoqarsimanersoq aperivoq. Naamik - nutaarsiassaqanngilaq.

Uummataa kassuttorujussuanngorpoq nannullu tumai malilerlugit. Minutsit tallimat qaangiutiinnartut nanoq qimaalereersimasoq takuaat. Olennguaq iliuuseqarasuarpoq: Qimmit ilaat pituussaarpai, taamaalillutik nanoq malillugu unitsinniassammassuk.

Qimmit uumasoq unitsikkaangamikku toqunniarlugu saassuttarpaat. Savissivimmi taamaaliortarput, periuseq inuit qimmillu pinngortitami imaannaanngeqisumi kinguaarinni atortarsimasaat.

Ilaqutariit Kristensenikkut nannunniartut videomi takuuk.

Ataata ilinniartitsisoralugu

Olennguaq Kristensen Upernaviup eqqaani Nuussuarmeersuuvoq, ukiullu 30-t Savissivimmi najugaqarsimavoq. Nunaqarfimmut nuliami najugaqarfigisaanut 1995-mi nuuppoq.

- Ukiut sisamat atuarfimmi timelæritut sulisimanera eqqaassanngikkaanni piniartuujuarsimavunga. Atuartullu ikilimmata piniarnermut uterpunga, Olennguaq Kristensen oqaluttuarpoq.

Apersortinnermi kingorna ataatami inuussutissarsiutaanik inuussutissarsiuteqalerpoq. Taanna piniartuuvoq. Taamanikkullimi Olennguaq piniartutut inuuvoq. Piffissap ingerlanerani piniariaatsit allanngorput. Assersuutigalugu manna qassusersorlutik puisinniartarput.

- Siku qajannarsinikuuvoq. Taamaammat pavunga kangimut sikutatuannguamut qassusersorpunga. Nunaannakkooriarluta sikumut aqqalaanngualaariarluta sikumut qassusersorluta, taanna oqaluttuarpoq.

Savissivimmi piniartutut inuunermi ukiup sikuata naatsorsuutigineqarsinnaannginnera unammillernartunut annerpaanut ilaalersimavoq.

- Siku angallavigisarput qaammatinik pingasunik kingusinaartalerkuugami. Taamaalilluni kaperlaap nalaani soorlu maanna, ungasinnerusumut angalasinnaanerput ajornarsinikuugami siku uninngajunnaarnikuugami. Taartumi ungasinnerusumut ingerlaniarsarineq ulorianartarami t. Qaammaleraangat pitsanngortarpoq, taanna oqarpoq.

Ullumikkut ualikkut marlup pingasup missaani qaamanerpaasarpoq. Taamaalernerani sinerissami ilulissat takusinnaasarpaat.

- Puisinilli takusaqarsinnaaneq ajorpugut, taarpallaartarpormi. Qaammartartut assut atugaraagut. Qimussertilluni isumannaarneq ajorpoq, qimmimmi sumunngarnissartik naluneq ajorpaat, aamma taartorujussuugaluartillugu, taanna oqarpoq.

Ukioq tamaat pilisartut

Olennguaq Kristenseni ukiup qanoq ilinera malillugu piniartarpoq, pilianillu katersisarluni. Upernaaq aasarlu qilalugarniarfiusarput.

- Neqai poortorlugit ukiumi qaqillattaagassatut. Aamma aasaanerani panernarnerani nikkulisarpugut, Olennguaq Kristensen oqaluttuarpoq.

- Ukiariartornerani qaqortamik pisaqarsimagaangama ukiassamut quassisarpunga, quat. Ukiuunerani neqai orsui atatiinnarlugit qeriteriarlugit karsinut quanut atortakkanut (quassiat) taqqamaniisittarpakka, taanna oqarpoq.

Olennguaq Kristensen ukiut tamaasa appaliarsunnik tippassiisarpoq. Tamanna mikiamik taaneqartarpoq, taakkulu Avannaanni nerisatoqaapput. Timmissat puisip amianut immiunneqartarput mersorneqarlutillu qaammatillu arlallit ujaqqanik perullugit ilinnginneranni puisip orsuanik poorneqartarput. 

- Aamma aaffassimagaangatta aarrup neqaata amia annertuunngorlugu uullisarparput ataatsimut patitsiinnarlugu aarrup amiata ilaanik qilersorlugu. Sivisulaartumik uninngatillugit ujaqqanik matoorlugit silaannartaqartillugit, Olennguaq Kristensen oqaluttuarpoq.

Qaannamik qilalugarniartartoq

Piniagarsuarni Olennguaq Kristensenip piniagannaava tassaavoq qilalugaq qernertaq.

- Qaannamik qilalugarniarusunnerusarpunga qernertanik. Umiatsiarluta qilalugaqarfimmukariarluta. Ilatta utoqqaanerusut ilitsersuussutaat malillugu suup nalaani qaqugukkullu qilalukkat takkuttarnersut, tamakkua utoqqaanerusortatsinniit malitarigatsigit nalerai, taanna oqaluttuarpoq.

Umiatsiarlutik aalartarput motorillu qamillugit qilalukkanik qernertanik sivisuumik utaqqisarput. Qilalukkanik takugaangamik Olennguaq qajartorluni avalalluni upattarpai.

- Taamatut piniarneq ilikkarakkuli amerlanertigut qilalukkerigaangama qajartorumanerusarpunga, taanna oqarpoq.

Qaannaminit Olennguup sungiussisimaqaluni qilalugaq naalillugu avatsertarpaa, taamaalillunilu kivisussaajunnaarsittarlugu.

Nammineerluni avitsiortarpoq.

- Avataq puisip amiinik qangatut sanasarpara. Suliarineri sungiunnikuuakka. Ajornanngikkaangat puisi pisarineraniit suliariniarsarisarpara, amia ilivittuutillugu. Qungasiata nalaa orsuiarlugulu meqquiartarpara, Olennguaq Kristensen oqaluttuarpoq.

Taamaalillunilu aningaasanik sipaaginnartanngilaq, pisariinnerusarporlumi aamma.

Piginnaasat ilisimasallu Olennguup pigisani tamaasa meeqqaminut arfineq marlunnut ingerlateqqinniartarpai.

- Meeqqat peqataasarput. Ernikka umiatsiaqartittarpakka. Piniakkanik pissarsinarnerusarmat taamatut. Assersuutigalugu qilalukkerigaangatta amerlanertigut naaleqqaartarpunga taava ernerma arlaata nammineq qaannaminik naaleqqittarpaat, taanna oqarpoq.

Olennguaq Nadullu arfineq pingasunik ernutaqarput – nukappiaraannaat.

Olennguaq Havighivimmi taamatut inuuvoq, ilaquttaminut pinngortitarsuarmullu qanilluni inuulluni. Ilisimasat piginnaasallu pigisai utoqqarnit ilikkagarai, taakkulu meeqqaminut ernuttaminullu ingerlateqqittarpai, taamaalilluni kinguaariippassuarnit ileqqutoqqat misilittakkallu annaaneqaqqannginnissaat isumagisarlugu.