Tusakkagut atuakkagullu tamaasa
upperisariaqarnagit immitsinnut oqarfigisarpugut – silassorissuusiap ukiuni
marlunni kingullerni ulluinnarsiutigilerneraniit eqqortuusorisat
amerliartuinnarput.
Ajoraluartumilliuna tusagassiorfiit
naapertorlugit una upperisariaqaripput: Amerikarmiut nunat eqqaamiutik tamaasa
aqulerusuppaat. Tamannalumi maanna Amerikami Akullermi aamma Amerikamilu
Kujallermi arajutsineqarsinnaanngitsumik atuuppoq, tassa avannarpasinnerusortaani.
Taamaaliornermut sorpiaat pissutaanersut paasiuminaassinnaavoq,
Inatsisartuinili republikanerit ilaasortaatitaasa arlallit isertuarnatik nunat
uuliaqarfillit pilerinarluinnartuusut oqaluttuaraat.
Tusakkagut atuakkagullu tamaasa
upperisariaqarnagit immitsinnut oqarfigisarpugut – silassorissuusiap ukiuni
marlunni kingullerni ulluinnarsiutigilerneraniit eqqortuusorisat
amerliartuinnarput.
Ajoraluartumilliuna tusagassiorfiit
naapertorlugit una upperisariaqaripput: Amerikarmiut nunat eqqaamiutik tamaasa
aqulerusuppaat. Tamannalumi maanna Amerikami Akullermi aamma Amerikamilu
Kujallermi arajutsineqarsinnaanngitsumik atuuppoq, tassa avannarpasinnerusortaani.
Taamaaliornermut sorpiaat pissutaanersut paasiuminaassinnaavoq,
Inatsisartuinili republikanerit ilaasortaatitaasa arlallit isertuarnatik nunat
uuliaqarfillit pilerinarluinnartuusut oqaluttuaraat.
Ivikkap kanaartaa
Uuliaqarfissuit pilerigaat. Trumpimut
naalakkersuisuinullu unamminartua tassaassaaq qanormi iliornikkut?
Soqqusaatsuliornerussaarmi nunat allat sakkutuulersorfigalugit
tigusariinnapajukkaluaraanni. Taamatut saassussinerit siunissami Nobelip
Eqqissinermut nersornaasiuttagaanik nersornaaserneqarnissamut
periarfissagissaartitsilernavianngillat! (FIFA-p nersornaasiussaa
naammassanngippat).
Taavami? Taava saassussinissamut
peqqutissarsiorneq aallartissaaq. Peqqutissarlu sapinngisamik
uppernakannersuusariaqarpoq. Ivikkap kanaartaanik
najummatsersimaarfissaqartariaqarmat nassuiaanissaq
piumasarineqalissagaluarpat. Kanaartarlumi nassaarineqareersimavoq:
Ikiaroornartunut tuniniaasartoqatigiissuarnullu sorsunneq.
Eqqissiivillutik sakkutuulersorneq
nalinginnaasunngortikkiartuaarpaat, iluatsilluakkaminnik periusissiaralugu.
Eqqarsaatigiinnariaavormi Trumpip iliuusai ukiut arlaqanngitsut iluanni
aallaqqaammut akuersaarneqarsinnaanngilluinnartutut isigineqariarlutik maanna
nalinginnaasunngormata. Oqaatsinik atueriaasia, suleqatiginneriaasia
naalagaaffinnillu inussiarnisaartunik kiisalu innuttaminut
sakkutuulersortarnera pineqartillugit, aammali sumiiffiit allarpassuarni.
Qaammatit marlussit qaangiuppata USA-llu
naalagaaffiit sanilini saassutarilerpagit soorlimi tuigut kiviinnarumaarigut.
Taannaavorlu Kalaallit Nunaannut
attuumassuteqartoq!
Akerliuniaqatigiit
USA-mi republikanerit USA-p
susassaqarfimminik aaqqissuussisariaqarnera oqallisigisaannut ilaavoq. Ima
paasillugu, uuliamik allanillu iluatinnartunik kujatiminnit pilersorneqarnertik
isumannarunnaarsartariaqartoq, tamannalu maannakkuugallartoq uagutsinnut
eqqissisaataagallarsinnaavoq: sussagamisigut? Eqqaaginnaraannimi USA-mit
oqariartuutaammat Kalaallit Nunaat pisariaqartikkitsik, soorlu maanna
saassutarisani taama pigai. Soorlu Trumpip pilerisuppasilluni oqartarneratut:
”We need Greenland” (Kalaallit Nunaat pisariaqartipparput, aaqq.).
Kalaallit Nunarput USA-p soqutigisaasa
ilagaat, tassa taakku isaannit isumannaagassanut ilaasoq.
Iliuuseqarsinnaavugut oqariaartuuteqarluta
avammut USA-mullu, soorlu taamaaliortoqartartoq; periarfissagut
atorluassagutsigit kattulluta akerlilersuilertariaqarpugut. Eqqaamassavarput
nunarsuatsinni ikinnguteqaratta – pisariaqartitatsinnik.
