Nato-p ataatsimiinnerani USA-p Danmarkillu akornanni ajornartorsiortoqarnissaa Ruttep ilimaginngikkaa

Kalaallit Nunaat pillugu akerleriissummi Danmark USA-p præsidentianit Donald Trumpimit tatineqangaarpoq.

Danmarkilli USA-llu akornanni pissutsit sisamanngornermi Nato-p qullersaqarfiani ataatsimiinnermi ajornerulernissaat Nato-p generalsekretæriata Mark Ruttep naatsorsuutiginngilaa.

Illuatungianik Arctic Sentinel-imik suliaqarneq Issittoq pillugu ataatsimoornermik nutaanik pilersitsivoq, Mark Rutte ataatsimiigiartoq oqarpoq.

- Suleqatigiittut Issittumi ulorianartorsiortitsinerup nalilerneqarnera eqqartorniarlugu ataatsimeeqatigiippugut. Tassa Kalaallit Nunaat, aap, kisianni aamma issittoq tamakkerlugu pineqarpoq, taamaammat aamma suleqatigisagut Sverigemiut Finlandimiullu, Issittumi misilittagartuut, ilaapput.

Issittoq illersorsinnaavarput. Arctic Sentry aqqutigalugu Ruslandip Kinallu Issittumut isersinnaannginnissaat qulakkeerparput, Mark Rutte oqarpoq.

Schweizimi illoqarfimmi Davosimi ataatsimiinnermi pingaarutilimmi Issittup illersornissaa Amerikamiut Kalaallit Nunaannik piginnittuunerannit pingaarnerutissallugu Ruttep Trump isumaqatigiissuteqarfigaa.

USA-p taamanimiilli Issittumi alapernaarsuinermik aaqqissuussaq tapersersorpaa, tamannalu Trumpip nunap immikkoortuani isumannaallisaanermut ernumassutaanut akissutissatut isigineqarsinnaavoq.

Nato-mi paasissutissiisitsisartut naapertorlugit Rusland Kinalu nunami tamatumani sakkutooqarfigisaminnik amerliartortitsipput. Rusland sakkutooqarfinnik umiarsuarnillu aqqartartunik amerliartortitsisoq Nato-mi paasissutissiisartoq qaffasissumik inissisimasoq naapertorlugu Kina isertorluni sakkutooqarnermi paasissutissanik katersilluni "ilisimatusariartortarpoq".

USA-li qanoq annertutigisumik Issittumi alapernaarsuinermut peqataassanersoq suli nalunarpoq.

Trumpip aqutsisui Europap isumannaallisaanermut akisussaaffeqarnerulernissaa kissaatigalugu arlaleriarlutik oqariartuuteqarsimapput.

Tamanna Europamik, Ukrainemik Issittumillu illersuinermut tunngatillugu atuuppoq.

USA Nato-miiginnassasoq Trumpip erseqqissarpaa, sisamanngornermili Nato-mi illersornissamut ministerit ataatsimiinneranni USA-p illersornissamut ministeria, Pete Hegseth, peqataassanngilaq.

USA-p iligiinnit piinngikkaluarluni Nato-mut ilaasortaanerminik pingaartitsinnginneratut isigineqarsinnaavoq. Taamaammat USA-p illersornissamut ministerip allattaa Elbridge Colby sisamanngornermi ataatsimiinnermi peqataatippaa.

Mark Ruttep Amerikamiut pingaarnersiueriaasiat paasilluarnerarpaa.

- Pete Hegset, USA-p præsidentia Trump taassumalu naalakkersuisuini qaffasissumik inissisimaffillit attaveqarfigiuarpakka.

- USA-lli nunarsuaq tamaat isumagisussaava. Nato pingaaruteqarpoq, aammali India Manerassuarlu pingaaruteqarput, taamaammat sooq taama pingaarnersiuisoqarnersoq paasinarluarpoq, Mark Rutte oqarpoq.

/ritzau/