Nuummiut peqqumaasersorlutik aallartipput: Sarfaliuutit dunkillu nungorartut

“Ding dong …” Stok Poortuummut, Nuummi talittarfitoqqamiittumut iseraanni matu taama sianertarpoq.

Matup siarnga januaarip imaalinerani tusarsaarpiartanngikkaluartoq ulluni kingullerni tusarsaaqaaq.

- Malunnartumik maannakkut ippassaminngaanniilli nunaqqatigut maani Nuummi uivertorsuupput. Inuit peqqumaasersorput imermut atortussaminnik, nerisassiornermi kissaassutissaminnik assigisaannillu, STOK Poortuummi pisiniarfimmi pisortaq Anthon Mølgaard oqarpoq. 

LÆS OGSÅ

Naalakkersuisut lancerer krise-vejledning: Borgerne skal kunne klare sig i fem døgn

USA-p nunatsinnik tiguaanialersaarnera peqqutaasoq Anthon Mølgaardip qularinngilaa. 

- Nunaqqatigut kiinarlullutik isertarput, annilaangarpasillutik, taanna oqarpoq.

Pisullu najummatsisimanarneranni sunnertinnaveersaarniarsarisaraluarpoq, noqikkuminaatsitaminik.

- Annilaangagaluarluta kiinarput allanngornaveersaartarparput. Imaluunniit uanga allanngornaveersaartarpara. Takutikkusunnagu annilaangallunga nuanniilliorlunga. Soorunami suliffiga qimakkaangakku annilaanganeq ersertarpoq. "Susoqassava? Unnugu pisoqassava?" Tassa nalunartua ullormiit ullormut, Anthon Mølgaard oqarpoq. 

Nioqqutissat nungorarput

STOK Poortuummi ulluni kingullerni kisimik ulapputinngillat. Sanaartornermi atortussanik pisiniarfik Stark Nuuk ulluni kingullerni aamma pisiniartoqaaluppoq. 

– Nalinginnaasumik ulapaartarpugut, kisianni peqqumaasersorneq peqqutigalugu nioqqutissanik aalajangersimasunik tunisaqarneruvugut, Lars Frandsen Stark Nuummi immikkoortortami pisortaq taama oqarpoq.

Sarfaliuutit kissarsuutillu petruuliutortut maanna nungoreersimasut taassuma oqaluttuaraa.

– Sillimanartumiiilernissarput piareersimaffiginikuunngilarput. Taamaammat nioqqutissat aalajangersimasut piffissami aalajangersimasumi tunisassagut kisiisa uninngasuutigaagut. Nioqqutissallu ilaat nungorarput, Lars Frandsen oqarpoq.

STOK Poortuummittaaq pisiassat inigisartagaasa ilaat imassaasuapput, dunkimmi inigisartagaat imaqanngilaq. Dunkiinnaanngitsut, gassit generatorillu aamma  nungussimapput.

- Angummassinnaanngilagut. Piniartarfitsinnut piniaqqippugut. Aatsaallu tikeqqissinnaallutik sapaatip-akunneri pingasut sisamat iluanni, Anthon Mølgaard oqarpoq. 

Ullormut pingasoriaat tikillugu tunisaqarnerusut

Tunisaqarluarneq niuertarfiutilinnit nuannaarutigineqakkajuppoq. Ullutsinnili pissutsit allaanerunerat isiginiassallugu avaqqukkuminaappoq. 

- Soorunami niuertarfimmut nuannerpoq, kisianni misigissutsitsigut eqqorneqarnerput annernarpoq, Anthon Mølgaard oqarpoq. 

Tunisaannatimmi eqqarsaatigissagunigit ullut marluk pingasut kingulliit kaaviaartitaqangaatsiarpoq. 

- Januaari eqqarsaatigissagaanni marluk pingasoriaammik ullormut tunisakkagut amerlipput, Anthon Mølgaard oqarpoq.

Sanaartortunut atortussanik tuniniaasuugamik nalinginnaasumik ulapaartarlutik Lars Frandsenip erseqqissaatigaa. Pissutsilli allaanerunerat maluginianngitsoorsinnaanngilaa.

– Januaari februaarilu tunisaqarfiunerpaasanngillat. Taamaammat nioqqutissanik aalajangersimasunik naatsorsuutiginngisatsinnik tunisaqarnerunerput soorunami malugaarput, Lars Frandsen oqarpoq.

Nioqqutissat nunguttut pigileqqinniarlugit piniarfigisartakkaminnut inniminnersimallugit taassuma oqaatigaa, februaarillu aallartisimalernerani tikissasut neriuutigalugu aamma oqarpoq.

LÆS OGSÅ

Morten er begyndt at ’preppe’: – For hvad nu hvis, ilaa?

Ulapinnerulissangapput

Pisiniarfiit taakkua marluk marlunngornermi ullaap tungaani pulaaratsigit Naalakkersuisut piareersarnissamut paasissutissanik immikkuualuttortaqarnerusunik suli saqqummiussinngillat. Suullu peqqumaatigineqassanersut annertunerusumik paasissutissiissutigineqariarpat pisiniat suli amerlanerulissasut qularinngilaat. 

– Pisiassat aalajangersimasut piumaneqartorujussuupput. Pisiniallu nioqqutissat aalajangersimasut pillugit apeqqutilliiuarmata suli takkuttoqartuassasoq ilimagiinnarsinnaavarput, Lars Frandsen oqarpoq.

STOK Poortuummi piffissaq ajornartoorfiusoq Stark Nuummisuulli piareersimaffiginnginnamikku piniarfigisartakkaminnut inniminnikkatik sapaatip-akunneri pingasut sisamat tungaanut utaqqisussaavaat. Taamaammat pisiniat naammagittartariaqarnerarpaat.

- Naalakkersuisut immikkut saqqummiissappata upalungaarsimaneq annertusarlugu innersuussinnaasannguagut kiserngoruttut aakua nappartat, Anthon Mølgaard oqarpoq. 

STOK Poortuummut pulaarnitsinni pisiniat suli isillattaapput. Ingerlaqqilersugullu Anthon Mølgaardip unitsikkallarpaatigut. Nunaqqatiminummi oqaasissaqarpoq. 

- Neriuppunga nunaqqatinnguagut tamarmik toqqissillutik nukittungaarlutik una pisoq qaangerluarumaaraat, naak annernaraluaqisoq tamatta nalaatarput maannakkoqqissaaq, Anthon Mølgaard attortisimarpasilluni taama naggasiivoq.