Tillinniarneq persuttaanermillu suliat arlallit

Kalaallit Nunaanni Politiit arfininngornermut unnuaani unnuakkut eqqissiviilliortitsinerit pillugit sulianut arlalinnut ornigutsinneqarput.

Politiit Nuummi persuttaanernik sulianik pingasunik imminnut attuumassuteqanngitsunik aallartitsisut, pigaartut pisortaat Malik Olesen oqaluttuarpoq. Taakku tamarmik imerniartarfinni pipput. Politiit pasineqartunik attaveqarput, suliallu nangittumik misissuiffigineqarput.

Taamattaaq Aasianni politiit persuttaaneq pillugu suliamik, Nipibarimi nalunaaqutaq marluk pingasullu qeqqata akornanni pisumik aallartitsipput. Tassani politiit pasineqartup kinaaneranik suli paasisaqanngillat, taamaammallu takunnissimasinnaasut politiinut attaveqarluarsinnaapput.

Unnuap ingerlanerani pingasunut tanneq qulingiluat Nuussuarmi kaajallattarissami biilernermik ajutoortoqarnera nalunaarutigineqarpoq, pisumi napparut aporneqarpoq.

Biilinik ingerlatsisoq oqartussanik nalunaaqqaarnani piffimmit qimaguppoq, taamaammallu ajutoorneq pillugu suliaq politiit aallartikkaat, Malik Olsen oqaluttuarpoq.

Politiit ippassaq tallimanngornermi Qaqortumi Kalaaliaqqamut tillinniartoqarneranik nalunaarfigineqartut, pigaartut pisortaata ilanngullugu oqaatigaa.

Tillinniarneq tallimanngornerup unnuaani pisimassangatinneqarpoq, tassani igalaaq aserorneqarsimavoq tillinniallu kalaaliaqqamut isersimapput.

Politiit pasisaqanngillat, takunnissimasinnaasunillu tusagaqarusupput. Politiit 70 14 48 atorlugu attavigineqarsinnaapput.