Tusarfiit: Zelenskyjip upernaaru præsidentimut qinersinissaq pilersaarutigaa
Volodymyr Zelenskyjip Ruslandip Ukrainemik tiguaanerata kingorna ukiut sisamassaanni pilersaarutini nalunaarutigissavaa, Financial Times allappoq.
Financial Times naapertorlugu Volodymyr Zelenskyj upernaaru præsidentimut qinersinissamik pilersaaruteqarpoq. (Toqqorsivimmit assi).
Assi: Petros Karadjias/Reuters
Ukrainemi præsidenti Volodymyr Zelenskyj upernaaru præsidentimut qinersinissamik pilersaaruteqarpoq, immaqalu aamma eqqissinissamut isumaqatigiissut Ruslandimut sorsunnermik unitsitsisinnaasoq taasissutigineqarumaarpoq.
Ukrainemi nunanilu killerni atorfillit atersineqanngitsut taamatut tusagassiuummut Financial Times-imut oqarput.
USA-p naalakkersuisuisa Ukrainep Ruslandillu akornanni eqqissinissamik isumaqatigiinniarnerit upernaap ingerlanerani naammassineqarnissaat piumasarigaat oqartussaasut tusagassiuummut nalunaaruteqarput.
Tusarfiit naapertorlugit Ukrainemi maajip 15-iat sioqqullugu præsidentimut qinersisoqassasoq eqqissinermillu isumaqatigiissut pillugu innuttaasut taasitinneqartassasut præsident Donald Trumpip aqutsisuisa piumasaraat.
Taamaanngippat Ukraine USA-p isumannaallisaanermut qularnaveeqqutaanik annaasaqarsinnaavoq, allassimavoq.
Zelenskyjip suleqatai oqaaseqartitsiniarnermut akinngillat, tusagassiivik allappoq.
USA qaammatit tulliuttut ingerlaneranni isumaqatigiissuteqarusuttoq Volodymyr Zelenskyj qanittukkut uppernarsaavoq.
- Juunip tungaanut suut tamaasa iluarsiiviginiarlugit oqarput. Taamaalilluni sorsuttoqarunnaassaaq, Zelenskyj aviisi Financial Times naapertorlugu sapaatip-akunnerani kingullermi tallimanngornermi oqarpoq.
- Pilersaarummillu erseqqissumik piumapput, præsidenti nangippoq.
Novembarimi USA-mi qinersisoqarnissaa præsidentip illorsuani ukkatarineqarniartoq Ukrainemi præsidenti aamma oqarpoq.
Ukrainemi Europamilu atorfilittat pilersaarutinut peqataasut naapertorlugit Zelenskyj februaarip 24-ani præsidentimut qinersisoqarnissaanik innuttaasunillu taasititsisoqarnissaanik nalunaaruteqarnissamik pilersaaruteqarpoq.
Februaarip 24-ani Ruslandip Ukrainemik tiguaaneranit ukiut sisamanngussapput.
Zelenskyj 2019-imi maajip 20-anili Ukrainemi præsidentiuvoq. Taamanikkut qinersisut 73 procentii qinersisoralugit ajugaavoq.
Præsidentiunera 2024-mi maajimili pisortatigoortumik qaangiukkaluartoq suli præsidentiuvoq. Tamanna Ruslandip Ukrainemut saassussinera pissutigalugu 2022-mi sakkutuut sukannersumik aqutsilernerannik peqquteqarpoq.
Ukrainemi tunngaviusumik inatsit naapertorlugu sakkutuu sukannersumik aqutsineranni qinersinissaq inerteqqutaavoq.
Ruslandimit Ukrainemillu aallartitat USA-lu ulluni marlunni Emiratit Arabiskiusut naalagaaffianni sorsunnerup unitsinnissaa pillugu sapaatip-akunnerani kingullermi isumaqatigiinniarput.
Suli isumaqatigiissuteqartoqanngilaq. Illuatungeriit nunap immikkoortiterneqarnera pillugu isumaqatigiinngissuteqarnertik siusinnerusukkut nalunaarutigisimavaat.
/ritzau/
