Slettemark uniunngingajalluni ooqattaasarami Danmarkimi ooqattaasallaqqinnerpaanngortoq

Ukaleq Slettemark pingasunngornermi Anne de Beschelu OL-imi siullermeerluni unammeqataagamik Danmarkip sisoraatinik ooqattaasartuini marlunni pitsaanerpaavoq.

Ataasiakkaarluni 15 kilometerimut unamminermi kalaallip nakersaatini inissilluarsimagamiuk 20-riarluni ooqattaasarnermini ataasiaannarluni uniorpoq.

Taamaalilluni minutsimik ataasiinnarmik pillarneqarluni ilanngaanneqarpoq, taamaalillunilu Anne de Beschemit siullinngorpoq.

Ukaleq Slettemark normu 52-itut apuuttoq Anne de Besche normu 70-itut apuuppoq. Julia Somin Frankrigimeersoq guultinnappoq.

- Nuanneqaaq. Timersortarfissuarmi nuannisartoqarluarpoq. Unamminermi ingerlalluartorujussuuvunga. Ulloq nuannerluinnarpoq, Ukaleq Slettemark, ataasiarluni unioraluarluni ooqattaasarnerminik naammagisimaarinnittoq, qungujulalluni TV 2-mut oqarpoq.

Ukaleq Slettemarkip ooqattaasarneq immikkut pikkoriffigaa. Kalaaleq sisoraaserluni ooqattaasartartoq sukkasuumik ooqattaasartarami nunarsuarmi pitsaanerpaat akornanniippoq.

Sisorarnermili pitsaanerpaat malissinnaassagunigit arriippallaarpoq – aamma Anne de Besche, taanna siorna Norge sinnerlugu peqataanani Danmark sinnerlugu peqataaniarluni aalajangerpoq, tassanilu norskit nunanut allanut unammisartuinut nukittuunut ilanngunnissamut periarfissaqarpiarsimanngilaq.

Anne de Besche sisoraraangami sukkasuujuvoq, kisianni Ukaleq Slettemarkitut sukkatigisumik ooqattaasarsinnaajumalluni ooqattaasarnermini pitsanngorsaasariaqarluni. Pingasunngornermi unamminermi ooqattaasarnini siulliit tallimat tamaasa iluatsippai, katillugilli sisamariarluni kukkugami minutsinik sisamanik pillarneqarluni ilanngaanneqarpoq.

Taamaalilluni Ukaleq Slettemark Danmarkimi sisoraaserluni ooqattaasartuni angusarissaarnerpaavoq. Apuunnermini Anne de Beschemit minutsimik ataatsimik sekundinillu 41,4-nik siuaqqavoq.

Ukaleq Slettemark Anne de Beschelu arfininngorpat februaarip 14-ianni sisoraatinik oqilaniuteqataassapput. Tassani 7,5 kilometerit ingerlavigissavaat.

/ritzau/