Assit takukkit: AWG aqqusinermi fiisternermik jakkinillu paarlaannernik naggaserneqarpoq

Arfininngornermi ukioq manna Arctic Winter Gameserneq naggataarnersiorneqarpoq. Maanna timersortartut angerlamut aallarput.

Ukioq manna Arctic Winter Gamesernerq arfinngornermi naggataarnersiorneq.

Assi: Hanna Hviid

Hanna Hviid Hanna Hviid Tusagassiortoq

Saqqummersinneqarpoq 15. martsi 2026 - 11:24

Ussassaarut

”Taamaalillutalu Arctic Winter Games 2026 naggaserparput.”

Arfininngornermi ualikkut White Horsemi Main Streetimi naggataarnersiortoqarmat nipilersortarfimmit taama oqartoqarpoq.

Timersortartut, sungiusaasut, mission staff, isiginnaartut allarpassuillu assigiinngitsunik qalipaatilinnik jakkillit aqqusinerni nikorfapput. Sapaatip akunnera tamakkerlugu Team Kalaallit Nunaannit timersortartut aappalaartunik jakkillit Erfalasutsinnillu tuiminniititallit ilisariuminarput.

ATUARUK AAMMA

Team Kalaallit Nunaat medalje-nanninniarnerat: taama naggaserneqarpoq

Pisarnerli malillugu timersortartut inuusuttunik holdinit allaneersunik jakkiminnik paarlaateqateqarnerannik, unammersuarnerit naggaserneqarput.

DJ nipilersortarfimmit nipilersuutinik appisimaarnerani taamaaliorput. Nipilersorfimmillu tassannga unammersuarnerit oqalugiarnernik Canadallu inuiattut erinarsuutaanik pisortatigoortumik matuneqarput.

- Nunarsuup tamarmi aatsaat taama Issittumik uukkatarinnitsiginerani kikkuunerput nukittuumik avammut nittarsaapparsi, Mary Simon Canadami Generalguvenør oqarpoq. Taanna Inunni siullersaalluni taamatut atuuffeqarpoq.

Ussassaarut

Naggataarnersiornermi qalipaatit assigiinngitsorpassuit takussaapput.

Hudsonip nersornaataa inuulluaqqusinerlu

Pisarnertullu Hudsonip nersornaataa aamma tunniunneqarpoq, taannalu timersortartut, sungiusaasut, piumassutsimik suleqataasut mission staffillu holdi unammersuarnermi “fair play”-imik takutitsinerpaaq taasinermikkut toqqartarpaat.

Uki0q manna aatsaat siullermeerluni taasinerit amerlaqatigiipput. Taamaammallu nersornaat Alberta Northimut Nunavummullu tunniunneqarpoq.

2023-mi Kalaallit Nunaata nersortaat taanna pissarsiaraa.

Kingorna AWG-p erfalasua the Arctic Winter Games International Committeemut utertinneqarpoq, tamaalillunilu unammersuarnerit naammassineqarput.

AWG-p erfalasua the Arctic Winter Games International Committeemut utertillugu tunniunneqarpoq.

ARCTIC WINTER GAMES 2026

Arctic Winter Games ukioq allorlugu ingerlanneqartarpoq, ukioq mannalu Canadami Whitehorsemi ingerlanneqassaaq.

Kalaallit Nunaanniit Arctic Games, Dene Games, sulorarneq, nerrivimmi arsaarartartut snowboardertartullu unammissutigineqassapput.

Timersortartut 59-it peqataapput. Dene Gamesimi timersortartut 16-it, Arctic Gamesimi 18-it, sulorarnermi arfineq-pingasut, nerrivimmi arsaararnermi arfineq-pingasut, snowboardimi sisamat kulturimilu tallimat.

Nunatta saniatigut Alaskameersut, Alberta Northimeersut, Yukonimeersut, Northwest Territoriesimeersut, Nunavimmeersut, Nunavik-Quebecimeersut Sapmillu peqataapput.

Timersuutit katillugit 20-t unammissutigineqassapput.

Kalaallit Nunaat 80-nik ujaminnannermigut angusarissaarput, taakkunanilu kuultit amerlanersaapput. Tamannalu Team Kalaallit Nunaanni unammisartuni 59-ni ataatsip ujaminnanneranik naleqarpoq.

Sapaammi unammeqatigiit Kalaallit Nunatsinnut angerlassapput. Ukiut marlukkaarlugit unammisarnermut taarsiullugu, siunissami ukiut pingasukkaarlugit unammisarnissaq aalajangerneqarpoq. Taamaammallu Arctic Winter Games tullia 2029-mi ingerlanneqassaaq. Sumilu tamatuma pinissaa suli aalajangerneqanngilaq.