Pilutaq Berthelsen, sakkortuumik timersortartoq Ilulissaneersoq, Uummannami Ice Marathonimi ukioq manna arfininngornermi marsip 21-anni ingerlanneqartumi ajugaavoq.
Issittumi arpannermi pissutsit sakkortulluinnarput, issillunilu apummi maakkarnartumi aqitsumik aputeqarnerata kinguneranik peqataasunut aqqutaa immikkut ilungersunartuuvoq.
Pilutaq Berthelsen, sakkortuumik timersortartoq Ilulissaneersoq, Uummannami Ice Marathonimi ukioq manna arfininngornermi marsip 21-anni ingerlanneqartumi ajugaavoq.
Issittumi arpannermi pissutsit sakkortulluinnarput, issillunilu apummi maakkarnartumi aqitsumik aputeqarnerata kinguneranik peqataasunut aqqutaa immikkut ilungersunartuuvoq.
- 30 gradit missaannik issikkami apullu maakkarnarluni, taamaattumik arpaffigalugu ilungersunartorujussuuvoq. Arpanneq sakkortuvoq. Apuuffissamulli apuukkama Uummannarmiunit pilluaqqusisorpassuarnit killitsinnartumik tikilluaqquneqarpunga. Nuan!, Pilutaq Berthelsen AG-mut oqaluttuarpoq.
Arpannerup nalaani issinnera malunnarluarpoq.
- Aaqqatikka qerigamik, kingusinnerusukkullu paasivara mikileqqakkut qeruttoorsimallunga. Tallora isimalu eqqaani amera aamma qerisimallutik oqaluttuarpoq.
Arpannermi pissutsit ilungersunaraluaqisut misigisani nuannersutut puigunaatsutullu oqaatigai.
- Taama sakkortutigisumik arpareerluni apuunneq nuannertaqaaq. Arpaffipput nuannerluinnarami, aqqutaani qimussit aamma aalisartut sikumi aalisartut takuakka. Arpaffik tamarmi Uummannami eqqaanilu pinngortitap alutornartup qaqqarsuillu kusanarluinnartut akornanni pigami, tamannalu immikkut misigisassaqartitsilluni, Pilutaq Berthelsen oqarpoq.
Arpattartoq misilittagaqarluartoq taanna meeraallunili arpannermik aallutaqarpoq.
Pilutaq Berthelsen aqqaneq-marlunnik ukioqarlunili arpattalerpoq. Uummannamilu Ice Marathon ilisimalluarpaa. Tassami isorartuumut arpatsitsineq tamanna kingullermik 2024-mi aaqqissuunneqarmat, aamma peqattaaffigigamiuk.
- Taamani nillerpallaannginnami apullu manngernerulluni, taamaattumik arpaffigalugu ajornannginneruvoq. Siorna aamma imaq sikunnginnami, asfaltikkullu aamma taseq kaajallallugu arpakkatta. Ukioq manna pissutsit allaanerulluinnarput, tamatumalu kinguneranik arpaffik ilungersunarnerulersillugu, oqaluttuarpoq.
Isorartuumut arpanneq marathonip affaanut aamma tamakkiisumik marathonimut periarfissaqarami, tamakkiisumullu arpannermi Pilutaq Berthelsen ajugaavoq.
