Kalaallit Nunaanni Arsaattartut Kattuffianni timersornermut siunnersorti nutaaq

Kulunnguaq Karlsen Kalaallit Arsaattartut Kattuffianni (KAK) timersornermut siunnersortitut atorfinitsinneqarpoq. Taanna ataqatigiissaarinermik, aaqqissuussaanermik ineriartortitsinermillu nuannarisaqarpoq, kattuffiullu sulineranut peqataalluarnera malugineqarsinnaalereerpoq. Allaffissornermi piginnaasaqarluarluni angusaqarluarnissamik noqqaassuteqarluni KAK-p nunatsinni arsaannerup nukittorsarnissaanut ineriartortinnissaanullu sulinerani qitiusumik inissisimassasoq naatsorsuutigineqarpoq.

- Kulunnguaq Karlsenip atorfinitsinneqarnera nunatsinni arsaattartut ineriartortinneqarnissaannut tunngaviusunik nukittorsaanissamut sulinitsinni pingaarutilimmik alloriarneruvoq. Piginnaasai, pimoorussinerata aammalu ineriartortitsinermut paasisimasaqarnera kattuffimmut aammalu suleqatigisartakkatsinnut tamanut iluaqutaalluassaaq. Upperaarput Kulunnguaq suliniutivut periusissiamut qaffassarnissaannut aammalu nunatsinni arsartartunut, sungiusaasunut aammalu piumassutsiminnik suleqataasunut pitsaanerusumik periarfissiissalluni tapersersuissasoq, allattaaneq Aqissiaq Ludvigsen tusagassiuutitigut nalunaarummi allappoq.

Kulunnguaq atorfimmini nutaami allaffissornermik siunissamilu ineriartortitsinermut suliniutini kattuffiup suliaanik suli pimoorussinerulersitsisuni nukittorsaaniartunilu suleqataajumaarpoq. KAK suleqatigiinnissamut qilanaarpoq, Kalaallit Nunaannilu arsaannerup silarsuaanut iluaqutaajumaartoq qularutiginagu.