Kalaallit Nunaanni isikkamik arsaannermi pissartanngorniunneq: B-67 ajugaaqqippoq

Angutit isikkamik arsaallutik ukioq manna pissartanngorniunnerat, naammassingajalerpoq, 2026-mi semifinalimut ullumi kingusinnerusukkut unammisoqassaaq.

Nuummiut B-67 aamma IT-79 naligiiffiusumik, unammillernartumillu sisamanngornermi unnukkut unammipput.

Unammisartut tamarmik saassussipput, unamminermilu akeqqatik tatiuarlugit, B-67 unammilluarput.

Nikki Petersenip B-67-imeersup minutsit marluk aallartinnerani isertitsineratigut, unammineq aallartilluarpoq.

Ilimaginngisamik minutsit 27-ivassaanni pisoqarpoq. René Eriksen Petersenip arsaq hjørnesparkerluni toqqaannartumik målimut isertippaa.

Unamminerup immikkoortuani siullermi B-67 2-0-mik siuaqqavoq.

Unamminerup immikkoortuata aappaani taarsersornerit amerlanerusut

IT-79-ip målmandiata annaassinermi kingorna ajoqusernertut isikkoqarpoq minutsillu 56-ianni taarserneqarluni.

Unamminerup immikkoortuata aappaani unammisartut kikkut isernissaat soqutigineqartorujussuuvoq, iligiit tamarmik taartaasut tamaasa atorpaat.

IT-79 unamminerup ingerlanerani arlaleriarlutik saassussinissamut navianartorsiortitsisaraluarput, isertitsinngitsoorpulli.

B-67-imiut arsamik isertitseriaqattaaraluarput, misiliinerilli arlallit isertitsinermik kinguneqaratik. Isertitseriarnerilu arlallit IT-69-mut målsparkissutigineqarput.

B-67 ajugaaqqippoq, unammilluarnerpaatullu Miilu Jensen B-67-imeersoq toqqarneqarpoq.

G-44 ajugaasuuvoq

G-44 aamma Aqissiaq ualikkut unammineranni, G-44 ajugaaqqippoq.

Semifinali tallimanngorpat ualikkut unnukkullu ungerlanneqassaaq. Bronzinnanniunneq ajugaaniutivinnerlu arfininngornermi ingerlanneqassaaq.