Niviarsiaqqat Nuummeersut arsaannermi unammersuarnermut peqataasut

B-67-imi arsaattartut niviarsiaqqat 15-it inorlugit ukiullit unammisartuisa juulip 20-aniit 25-anut Hjørringimi Dana Cupimi peqataagunik inuunerminni misigisaqarnissartik qilanaarisinnaavaat.

Niviarsiaqqat unammiuaarnermi peqataanertik suliffeqarfinnit Arctic Importimit aamma Hørkramimit aningaasalersorneqartoq paasitinneqareerput, taakkualu unammisartut aningaasartuutaat tamaasa – ilaatigut ineqarneq, nerisaqarneqs unammersuarnermilu peqataaneq – akilerpaat.

- Tamanna niviarsiaqqat B-67-imeersut arsaannissamut periarfissaqaannannginnerannik – nunarsuarmili tamarmit unammisartunik peqateqarnissaannik isumaqarpoq, tassani ikinngutigiinneq, kulturikkut naapitsineq misigisassarsiornerlu timersornermut atassuteqarput, Arctic Importimi tuniniaanermut pisortaq Henrik Kronborg oqarpoq.

Pingaarutilik

Niviarsiaqqat 15-it inorlugit ukiullit siorna angalanerat aamma Arctic Importimit Hørkramimillu akilerneqarpoq – tamannalu niviarsiaqqanut pingaaruteqartorujussuuvoq, timersoqatigiiffimmi sungiusaasut Sermitsiamut taamanikkut oqaluttuarput.

- Niviarsiaqqat Dana Cupimi peqataanerat kalaallit arnat isikkamik arsaanneranni pingaaruteqartorujussuussaaq, B-67-ip sungiusaasua Nikolaj Mathæussen oqarpoq.

- Unammisartut inuusuttut peqataasinnaanerat pingaaruteqartorujussuuvoq, inuunerminnimi misigisassassaasa nuannernerpaat ilagaat. Angajoqqaat aningaasaliisullu meeqqat taamatut nuannersumik misigisaqartinniarlugit ilungersorsimammata qujassutissaqarfigaagut. Qularinngilara inuunerminni puigunngisaannassagaat — inuunerminni misigisassatut nuannernerpaatut isigissagaat.

Arsaattarfiit ivigallit angisuut

Taanna nukappiaqqanik sungiusaasumit Ungaaq Abelsenimit tapersersorneqarpoq, taannalu ima oqarpoq:

- Arsaattarferujussuarmi nunani tamalaani angissutsit najoqqutaralugit angissuseqartumi arsaannermik misiliisinnaagatta nuannaarutigeqaarput. Nuummi taama periarfissaqarneq ajorpugut. Danmarkimittaaq arsaaffiit aallakaatitani takusartakkatsitut ivigaqarput.

Hjørringimi arsaannermi unammiuaartoqaraangat holdit 1000-init amerlanerusut nunanit 45-neersut arsaattartunik 20.000-nik nuannarinnittorpassuarnillu peqataaffigineqartut ukiut tamaasa ulluni tallimani katersuuffiusarput.

Iligiit tamarmik sungiusaatitut unammissallutillu minnerpaamik pingasoriarlutik pingaarutilinnik unammisarput kiisalu Dana Cupimi unammersuarnermi tunngaviusumi anngunniullutik unammisarlutik. 15-it inorlugit ukiullit marloriarlutik minutsinik 20-nik sivisussuseqartunik unammisarput, angajulliunerusullu marloriarlutik minutsinik 25-nik sivisussuseqartunik unammisarlutik.

Arsaattartut Hjørringimiinnerminni atuarfinni najugaqartarput – Vendsysselimilu atuarfiit tamangajammik inuusuttut bussinut ilaalluni arsaattarfinnut assigiinngitsunut ingerlaartinneqartussat inissaqartinniarlugit ineqqarfigineqartarput.

Kalaallit arsaattartut katillugit 13-it siorna Dana Cupimi peqataapput.