Nunanut allanut unammisartut Kroatiami futsalimi nunat tamalaat unammiuaarneranni peqataassasut

Futsal Week Summer Cup Kroatiami Porečimi ingerlanneqalerpat Kalaallit Nunaat ilanngullugu nunat 16-init peqataassapput.

Nunanut allanut unammisartut U-19-it unammiuaarnermi Europami pissartat Portugalimeersut siulliullugit unammissagaat Kalaallit Arsaattartut Kattuffiat (KAK) tusagassiuutinut nalunaarummi allappoq.

– Europami pissartat siulliullugit unammisussaanerisa qanoq qaffasitsigisumik unammiffeqarnissarput ersersippaa.

– Anguniagassarput kisiat angusaqarnissaqanngilaq, kisianni pitsaanerpaanut uuttornissarput aammalu ilinniarfiginissaat pingaaruteqarpoq. Taamatut misilittagaqarneq kalaallit futsalernerannik sivisuumik isigalugu ineriartortitsisarpoq, U19-imi nunanut allanut unammisartut sungiusaasui Lars-Erik Reimer, Aqqalooraq Møller-Lund aamma Patrick Frederiksen oqarput

Arnat nunanut allanut unammisartut unammiuaarnerat aallartilereersoq

Portugalip Kalaallit Nunaatalu unamminerat ammaasuussaaq, sapaatillu akunnerata tulliani sisamanngornermi ingerlanneqassaaq. Unammiuaarneq Facebookikkut toqqaannartumik malinnaaffigineqarsinnaavoq, maannakkorpiarlu arnat unammiuaarnerat malinnaaffigineqarsinnaavoq, tassani kalaallit nunanut allanut unammisartut arnartaat peqataapput.

Arnat unammiuaarneranni ullumikkut qasuersaarfiuvoq, aqaguli tallimanngornermi kalaallit arnartaat Ungarnimut unammissapput, tamannalu Facebookikkut malinnaaffigineqarsinnaavoq, tassani aamma arnat nunanut allanut unammisartut unamminerannit siullernit assit immiussallu isiginnaarneqarsinnaapput.