Nunanut allanut unammisartut sungiusaasuat GM-ip kingorna: Inuusuttut piginnaasaqarluartut tupigusuutigaavut

Morten Rutkjærip unamminerit tamaasa isiginnaarpai, iligiillu tamarmik iliuuseqarnerat nuannaarutigaa.

Angutit silami arsaannermi pissartanngorniunnerat Maniitsumi aggustip sisamaaniit arfineq-pingajuannut ingerlanneqarpoq.

- Isumaqarpunga unammisartut timimikkut piginnaasaat pitsaalluinnartoq, unammisartut ulluni tallimani unammipput arsarluarlutillu, Morten Rutkjær oqarpoq.

Nunanut allanut unammisartut sungiusaasuat Morten Rutkjær 2019-imiilli Kalaallit Nunaanni nunanut allanut unammisartunut siuttuusimavoq, kalaallit arsaattarnerat pillugu ukiut ingerlaneranni ilisimasaqarluarpoq, arlaleriarlunilu nunanut allanut unammisartunut sungiusaasuunini sivitsortarlugu.

Morten Rutkjærip unammiuaarnermi kalaallit arsaannerat ineriartornerallu takusinnaalluarpai, nunanullu allanut unammisartunut ukiuni arfineq-marlunni sungiusaasuunermi kingorna taanna isumaqarpoq ukioq manna unammiuaarneq tupaallannartumik pitsaalluinnartoq.

Arsaattartut tupaallannartumik pikkorissut

Morten Rutkjærip unamminerit tamaasa unamminermi arsartoq pitsaanerpaaq toqqartarpaa. Unammisartut amerlassusaat iligiillu ingerlalluarnerat tupaallaatigai:

– Iligiit illersuinerminni aaqqissuussaalluarnerulersimapput, iligiillu pitsaasut aaqqissuussaalluartut aamma unammisartut ataasiakkaat pikkorissut takuakka, Morten Rutkjær oqarpoq nangillunilu:

– Inuusuttuaqqat arsaattartut amerlasuut takuakka, eqqarsaatigaaralu taakku arsaannermik ingerlatitseqqikkunik siunissami nunatsinni arsaannermi pingaarutilimmik inissisimalersinnaasut.

Nunanut allanut unammisartunut sungiusaasarneq

Unammiuaarnerit sapaatip-akunnerata naanerani naammassineqaqqammerput, Morten Rutkjærilli nunanut allanut unammisartut eqqarsaatigilerpai, katersuunnissaannilu kikkut peqataasinnaanersut eqqarsaatigalugu.

– Siornatigut takusimanngisannik maluginiarnartullu tassaapput qatanngutigiit Aqissiameersut Jørgen aamma Søren Kreutzmann. Taakku siulersuilluarput arsaannermilu angusarissaarlutik. Arsaattartut taamaattut pingaartittuarpakka, taakkualu eqqarsaatigaakka, Morten Rutkjær oqaluttuarpoq

GM-ertoqarnerani ukioq manna holdit sisamaannaat peqataagaluartut unamminerit pissanganartuullutillu tiguartinnartuusut, Morten Rutkjær isumaqarpoq.

Neriuutigaali siunissami illoqarfinnit, assigiinngitsuneersut amerlanerusut peqataasinnaalissasut. Taamaalilluni unammiuaarneq Kalaallit Nunaannut tamanut sinniisuunera annertusisinnaalluni.

Aammattaaq erseqqissarpaa unammisartut pimoorussinerat, unammiuaarnermilu takutinneqartutut pitsaasumik unammiuaartoqarneranut ukioq manna pingaaruteqarnerpaasut.