Nuummi naluttartut klubbiat: Meeqqat aatsaat taama angusarissaartigipput
Nuummi naluttartut kllubbiat Reykjavik International Gamesimi DM-imilu arlaleriarlutik ujaminnapput.
Nuuk Svømmeklub Reykjavikimi unammiuaarnermi
Assi: Nuuk Svømmeklub
14-inik ukiulik Ronja Wraae Würtz Danmarkimi nalulluni pissartanngorniunnermi kuultinnappoq.
Danmarkimi pissartanngorniuttoqannginnerani naluttartut Reykjavik International Gamesimi peqataajartorlutik Reykjavikimukarput. Ronja Wraae Würtz inuusuttut 50, 100 aamma 200 meterimut butterflymik nalulluni unammineranni kuultinnappoq. Aamma ukioqatigiiaani assigiinngitsuni finalimut annguppoq, tassanilu inersimasunut naluttartunut 200 meterimut butterflymut sølvinnappoq 100 meterimullu bronzennalluni.
Ronja Wraae Würtz DM-imi kuultinnattoq
Assi: Nuuk Svømmeklub
Reykjavikkimiit Ronjap kuultinik pingasunik, sølvimik bronzemillu ujaminnappoq.
Nuummi naluttartut klubbiata Erfalasorput nalulluni nasani, tujuuluaqqani taskinilu atorpaat.
Kuultinnanneq siulleq
Ronja Wraae Würtz aamma Ragna Sander Granlien Reykjavikkimiit Danmarksmesterskabimut nalunnermik unammiarlutik peqataapput. Ronja 200 meterimut butterflymut DM-imi kuultinnappoq, tassani qallunaat naluttartuinut ukioqatiminut unammilluni. Taamaasilluni Ronja Kalaallit Nunaanni naluttartuni siullersaallutik DM-imi kuultinnapput.
- Nalunngilarput naluttartuvut sungiusarluarlutillu eqqarsartaatsikkut nukittuujusut, Reykjavikimili taama angusarissaartigisussaalluta DM-imilu kuultinnannissarput ilimagisimanngilarput, Ane Wraae Nielsen sungiusaasut sinnerlugit oqarpoq.
Ronjap Island Gamesimut 2027-mi Savalimmiuni pisussamut peqataanissani kajumigilluinnarpaa, naak taamaalioruni maannakkut rekordiminit 10 sekundinik sukkanerusariaqaraluarluni.
- Orkneymi Island Gamesimi siorna peqataaneq misigisaavoq nuannerluinnartoq. Qeqertani tamani immikkut ittumik misigisaqarfiuvoq. Nunarput sinnerlugu ujaminnakkusukkama uteqqikkusuppunga, Ronja Wraae Würtz oqarpoq.
Ataatsimuussuseqarluarneq
Timersortartut peqatigiiffianni ujaminnanneq sungiusaasut inuusuttullu ilungersornerat nuannaarutigineqarput. Taamatulli pingaaruteqartigaaq sungiusaqatigiinnerit unammiuaarnerillu inuusuttut ataatsimoornerannut iluaqutaasarnerat. Imminnut qiimmassaanermikkut timersornerulernissamut kajumissaaqatigiittarput, aamma inuusuttut namminneq ineriartornertik ikinngutimillu ineriartornerat malugisarpaat.
- Ineriartortitsisimanerput meeqqallu ilikkagarisimasaat angusimasaallu nuannaarutigalugillu tulluusimaarutigaagut, Ane Wraae Nielsen oqarpoq.
Angalaneq Vestnordisk Hovedstadsfondimit, NATA-p Kalaallit Nunaannut aningaasaateqarfianit, Helene aamma Svend Junges Fondimit, Kommuneqarfik Sermersuumit aamma Kalaallit Nunaanni Timersoqatigiit Kattuffianniit tapiissutigineqarnikkut pivoq.
