Qatanngutigiit Slettemarkikkut World Cupimi stafettimi USA ajugaaffigalugu nuannaartut

Ukaleq aamma Sondre Slettemark, sisorallammaat, ukiuunerani OL sioqqullugu unamminerminni kingullermi angusarissaarput. Qatanngutigiit World Cupimi stafet-imi Nove Mesto-mi Tjekkiami ingerlanneqartumi single mix-imi angusarissaarluarlutik holdini 24-ni normu 16-nngorput.

Qatanngutigiit taakkua stafettimi arpannerminni arlaleriarlutik siuaqqasimapput, normu 12.-itut inississimagaluarlutik normu 16.-inngorlutik – nunanit USA-mit Canadamillu siulliullutik. Qatanngutigiillu nuannaarluinnarput.

– Single Mix-stafetimut tulluarluinnarpugut nuanneqalunilu. Unammineq sakkortuvoq, timimmi adrenalinamik sukkasuumik ingerlatitsisarluni. Aamma naatsorsoruminaappoq, aqqutaa naappallaarmat ooqattaasarnerlu aalajangiisorujussuulluni. Angusat naammagisimaarluinnarpagut, minnerunngitsumik USA ajugaaffigigatsigu. Strafrundeqarnaveersaarpugut, allatigulli ooqattaasarnerput pitsaanerpaajunngilaq. 40-nik ooqattaasarnernut aqqaneq-marlunnik ilassuteqarnerput naammagilluinnarsimanngilarput, kisianni taassuma takutippaa angusarissaarnerunitsinnik suli qaffasinnerusumik inississinnaasugut, qatanngutigiit Greenland Biathlon Federationimit tusagassiuutitigut nalunaarummi oqarput.

Obertilliachimi Østrigimiittumi sungiusarniarlutik maanna aallarput, tassanilu Ukaleq aamma Sondre Slettemark ulluni tulliuttuni aqqaneq-marlunni ukiuunerani OL-ertoqarnissaanut piareersarneqassapput.