Siulittaasup kajumissutsiminnik ikiuuttut nersualaarlugillu nalliuttorsiornissaq qilanaaraa

Jens Klaus Lennertip, siulittaasup, ukioq manna Arctic Circle Racertoqarnera naammassimmat nuannaarnini toqqortorsinnaanngilaa.

- Suut tamarmik ingerlalluarput, pisarnertunaasit peqataaneq nuannersorujussuuvoq, siulittaasoq – Kasimik nalunnginneqarnerusoq – qungujulalluni oqarpoq.

Ukioq manna peqataaniarlutik nalunaarsimasut 200-pput, taakkunannga 196-it Sisimiuni aallaqataallutik. Ukiunut siuliinut sanilliullugu ikinnerulaarput, siulittaasullu oqarneratut kingusissukkut aputeqarlualernera pissutaanerpaavoq. Aputininniaataarpoq, unamminissamullu angumersilluni – Jens Klaus Lennertillu tamanna pissangassutigisimaqaa.

Pissutsit ilungersunartut arpannermi aamma malugineqarput. 160 kilometerimut ingerlaartut ullup aappassaani aqqutissaat allanngortinneqarpoq. Nunami aputikinnera pissutaalluni nalinginnaasumik 53 kilometerisut takissusilimmik ingerlasoqartaraluartoq 60 kilometerinngortinneqarpoq.

- Takinerulaarpoq, tamannalu arpattut nissuminni malugisinnaavaat, siulittaasoq nuannersumik illalaarluni oqarpoq.

Naak aqqut allanngortinneqaraluartoq anorersuarnissaanillu ilimasaarisoqaraluartoq arpanneq nuannersumik naammassineqarpoq. Qujanartumik anorissaq aamma takkutinngilaq. Minnerunngitsumik kajumissutsiminnik suleqataasorpassuit pissutsini ilungersunarsinnaagaluartunik ikiuunnerat nersuaalaarneqarpoq.

– Kajumissutsiminnik sulisuvut pikkoringeqaakka. Unnuiffissanik nappartiterinermik, piiaanermik nunamilu aqqulluttumi assartuinermik ukiut tamaasa suliarujussuarmik suliaqartarput. Tulluusimaarutigeqaavut, Jens Klaus Lennert oqarpoq.

Apummi aqqutigineqarsimasut suli takuneqarsinnaasut aappaagumut pilersaarutit nalliuttorsiornissarlu takorloorneqalereerput.

– Aappaagu ukiut 30-nngortorsiornissarput qilanaareqaarput, taamaattumik immikkut ittumik pilersaarusiussaagut, siulittaasoq neriorsuivoq.