Nuummi timigissartarfik nutaaq portuliartuinnarpoq. Quleriit pingasut, atortorissaarutit nutaanerpaat anguniakkallu illoqarfiup killeqarfiinit ungasinnerusut.
Allan Juhl, maanna Fitnessgl-imi piginnittunngoqqittoq, suliniummik tamatuminnga aallarniisuuvoq.
Nuummi timigissartarfik nutaaq portuliartuinnarpoq. Quleriit pingasut, atortorissaarutit nutaanerpaat anguniakkallu illoqarfiup killeqarfiinit ungasinnerusut.
Allan Juhl, maanna Fitnessgl-imi piginnittunngoqqittoq, suliniummik tamatuminnga aallarniisuuvoq.
Allan Juhl-ip suliffeqarfik Jens-Jakob Sandgreenimit sivikitsumik pigineqareersoq apriilip aallaqqaataani piginnittuuffigeqqilerpaa. Allan Juhlili pisarnertut ingerlasoqarnissaa pinngilaa. Nutaaliornissaq pivaa.
- Fitnessgl uterfigeqqillugu nuanneqaaq. Nutaarluinnarmilli takorluugaqarpunga, taanna qungujulluni oqarpoq.
Sumiluunniit najugaqaraluaraanni kikkulluunniit timigissarsinnaassasut
Allan Juhlip maanna Nuummi Fitnessgl-ip nutaap aggustimi ammarnissaa anguniarlugu suliniuteqangaarpoq. Timigissartarfik sananeqaleruttorpoq, anguniakkallu ersaripput.
– Inussiviup eqqaani Nukissivimmik taasatsinnik sanaartuleruttorpugut, taanna oqarpoq.
Timigissartarfissaq quleriinnik pingasunik initalik timersoqatigiinnullu nutaanik initaqartussaq nutaaliaasunik atortorissaaruteqassaaq. Illuli taanna Allan Juhlimut aallaqqaataannaavoq. Takorluugai Nuummit ungasinnerupput. Fitnessgl tamanut atuutissaaq – aamma illoqarfinni timigissartarfeqanngitsuni najugaqartunut.
- Tamanut timigissarfimmik oqaruma pimooruppara. Qaqortumi, Paamiuni Upernavimmiluunniit najugaqaraluaruit Fitnessgl aamma ilinnit atorneqarsinnaassaaq, taanna oqarpoq.
Anguniakkami teknologi qitiuvoq. Allan Juhlip Nuummi sungiusarnerit toqqaannartumik nunatsinnut tamarmut aallakaatinneqarsinnaanissaat sulissutigaa.
- Ullumikkut atortorissaarutitut periarfissat atorlugit sungiusarnerit toqqaannartumik aallakaatinneqarsinnaapput, inuillu taamaalillutik angerlarsimaffimminni illoqarfiulluunniit timersortarfiani peqataasinnaallutillu peqatigiinnernut ilaaginnarsinnaapput, taanna nassuiaavoq.
Allanip Nuummiit – Kalaallit Nunaanni sumiikkaluaraanniluunniit – sikkilernermi sungiusarnerit toqqaannartumik isiginnaarneqarsinnaanissaat takorluugaraa.
Toqqorsivimmit assi: Leiff Josefsen
Aamma illoqarfinni mikinerusuni periarfissarpassuaqartoq taanna isumaqarpoq.
- Tasiilameeqqammerpunga. Sikkilit spinningerutit quliupput, kisiannili sungiusaasussaqanngilaq. Taakkua timersoqatigiinni sungiusaqatigiinnernut ilanngunnissaat naleqquppoq, taanna oqarpoq.
Inuit nutaat isumassarsiallu nutaat
Allan Juhlip ineriartorneq tamanna pissutigalugu suliffeqarfik pisiareqqippaa.
- Fitnessgl-imik piginnittuunnginnerma nalaani suut tamaasa avataanit takusinnaalerpakka. Taamaalillunga nutaanik isumassarsillungalu allatut eqqarsalerpunga, taanna oqarpoq.
Toqqaannartumik aallakaatitsinerup saniatigut sungiusarnissamut neqeroorutit nutaat siammasinnerusut aamma sulissutigai. Ilaatigut "utoqqasaanut" sungiusartitsineq arnaannaallunilu timigissaqatigiinneq. Timigissartarfiit sunik imaqarsinnaanerat aammattaaq eqqarsaatigeqqippaa. Sauna aamma pilersaarutaavoq.
- Inuit ornikkumasaannik pilersitsissaagut. Pisariaqartitanut piginnaanernullu tamanut inissaqartitsisoq, Allan Juhl oqarpoq.
Suliniutit tamarmik aggustimi ammaranissamut piareersimanngillat. Siunniunneqarpulli.
Nuummi timigissartarfik nutaaq ammarpat Fitnessgl — illoqarfimmit ungasinnerusumut anguniagaqarluni - nutaamik aallartissaaq. Champagnemilli iggiserluni persuarsiutigineqarnaviarunanngilaq.
- Immaqa imeruersaatinik proteinimik akulinnik sassaallerluni natersuarmillu aappalaartumik siaarsilluni, Allan Juhl illarluni oqarpoq.
Ataaserli aalajangersimavoq: Allan Juhl Fitnessgl-imi piginnittunngoqqippoq. Anguniagarlu erseqqippoq — kikkut tamarmik timigissarsinnaassapput.
