Ukiunut pingasunut isumaqatigiissuteqarnikkut futsal nukittorsarneqassasoq

Elite Sport Greenland aamma Kalaallit Arsaattartut Kattuffiat ukiuni pingasuni suleqatigiinnissamut isumaqatigiissuteqarput, 2028-p tungaanut nunatsinni futsalimik ineriartortitsineq nukittorsarniarlugu. Tamanna illuatungeriit tusagassiuutinut nalunaarutaanni atuarneqarsinnaavoq.

Isumaqatigiissutikkut sammineqassallutik pikkorinnerpaat piginnaaneqarnerpaallu ineriartortinnissaat, tamatumalu saniatigut arnat angutillu nunanut allanut unammisartut patajaatsumik suliniuteqarfigineqarnerulernissaat qulakkeerneqassalluni. Nunanut allanut unammisartut pitsaanerusunik sinaakkusersugaanissaat anguniagaavoq, nunani allani unammmisartunut kakkannerpaanut unammisinnaalerniassammata.

Elite Sport Greenlandimi siulittaasup tullia Karl Peter Kristensen ima oqarpoq:

- Suleqatigiinnissamut isumaqatigiissusiornermi pingaartipparput, qaffasissumik timersortartut siunissamut ungasinnerusumut periusissiaqarnikkut unammillersinnaassutsikkullu nukittorsarnissaat, qaffasissunillu timersornikkut anguniagaqarnissaat. Aammattaaq pingaartipparput patajaatsumik ataavartumik katerittarnitsigut kiisalu unammisarnikkut sapinngisamik qulakkeerneqarnissaa, nunat tamalaat akornanni qaffasissumi timersornermi inissisimassagaanni pingaaruteqartuusut.

Taamatuttaaq piukkunnaatillit ineriartortinneqarnissaat pingaaruteqarpoq, inuusuttut nunanut allanut unammisartunut aqqutissiuunneqarnerat erseqqarinnissaa, piginnaasatigut eqqarsartaatsikkullu ineriartortinneqarlutik. Isumaqatigiissut futsal-i pillugu ineriartortitsinermut tunngaviusumik nukittorsaaqataavoq, aammalu futsal-ip periarfissai angusaqarluarfiusinnaasut piviusunngortinniarlugit pitsaanerusumik aaqqissuussinermik pilersitsilluni.”

- Suleqatigiinnissamut isumaqatigiissummik atsioqatigiinnitsigut, siunissaq ungasinnerusoq eqqarsaatigalugu periusissiaq tunngavigalugu sulisoqarnissaa pingaartipparput, tamatumani sammineqassalluni futsalimi nunanut allanut unammisartut pikkorissut nukittorsarneqarnissaat aamma unammillersinnaasunik immikkut ilisimasalinnik tunniusimasunillu timersornermut anguniagaqarluartunik ineriartortitsinissaq. Tamatuma saniatigut sammineqassallutik ingerlaavartumik sammisassaqartitsinerup qulakkeernissaa, aamma aalajangersimasumik nunani tamalaani unammisarnissaq, tamannami pitsaanerpaamik angusaqarnissamut aalajangiisuulluinnarmat. Tamakkua saniatigut pikkorissaanerit ineriartortinnissaat pingaartinneqassaaq, inuusuttunit nunanut allanut unammisartunit inersimasunut nunanut allanut unammisartunut ingerlaqqittarnissaat ersarissarneqassalluni, tamatumani unammisartut teknikikkut, periaatsikkut eqqarsartaatsikkullu piginnaasaqarnertik ineriartortissammassuk. Isumaqatigiissut ataatsimut isigalugu Nunatsinni futsalip ineriartortinneqartuarnissaanut patajaatsumik tunngaviliivoq, futsalimilu nunanut allanut unammisartut pisinnaasaasa pitsaanerusumik atornissaannut sinaakkutissat pitsaanerusut, pikkorinnernik nukittuunik aaqqissuussineq aqqutigalugu angusaqarluarnissamut ineriartortitsisoqassalluni, Karl Peter Kristensen oqarpoq.

Kalaallit Arsaattartut Kattuffianni siulittaasup Kenneth Kleistip ingammik angutit arnallu futsalertarnerannut isumaqatigiissut pingaaruteqarnerarpaa:

- Angutit nunanut allanut unammisartut kiisalu U-19-imi unammisartut ukiuni kingullerni ataavartumik ineriartornerminnik takutitsipput aamma nunani tamalaani qaffasissumik piginnaasamikkut inissisimanerulersimallutik. Tamakku ilisimasat, ineriartorusussutsip kiisalu patajaatsumik aaqqissuussaasumik suliaqarnerup takussutissartarai. Nunanut allanut unammisartut angusaat qaffasissumillu pitsaassuseqalernermi Nunatta futsalimi inissisimanera, nunanit tamalaanit ataqqineqarnera nukittunerulersippaa. ESG suleqatigalugu alloriaqatigiinneq tamanna nuannaarutigaarput. Angutit tapersersorneqarnerat pingaaruteqarpoq, taamaattorli aamma arnat futsalimi ineriartortinneqarnissaat aningaasaliiffigineqartalernissaallu pingaaruteqartorujussuuvoq. Nunatsinni qaffasissumik timersornermi naligiinnerusumik ineriartortitsisoqalernissaa isumaqatigiissutikkut ersersinneqarpoq. Arnat ESG-mut isumaqatigiissummi ilanngunneqarnerat pingaarutilerujussuuvoq, oqarpoq.

Isumaqatigiissut aqqutigalugu illuatungeriit neriuutigaat, Kalaallit futsalimi unammisartut patajaatsumik anguniagaqarluartumillu tunngavilerneqarnissaat, nunanut allanut unammisartut angusarissaarnerunissaat piukkunnartunillu nutaanik ineriartortitsinissaq ukiuni tulliuttuni anguneqarsinnaaqqullugit. Tamatuma peqatigisaanik suleqatigiinnikkut arnat aamma angutit futsalertarnerat naligiinnerusumik ineriartortinneqasinnaalissaaq.