Namminersorlutik Oqartussat ingerlatseqatigiiffii aatsaat taama akiitsoqartigipput
Namminersorlutik Oqartussat suliffeqarfiutaat ukiumoortumik naatsorsuutaanni kingullerni aatsaat taama akiitsoqartoqartiginerat takuneqarsinnaavoq, tassa 12 milliardit koruunit sinnerlugit.
Royal Greenlandip kilisaatinik nutaanik annertuumik aningaasaliinerup kingorna akiitsui erniallit – sivikitsumik sivisuumillu – 2024-mi naatsorsuutini 4,66 milliardit koruuniupput.
Assi toqqorsivimmiit: Leiff Josefsen
Mittarfinnut, kilisaatinut timmisartunullu aningaasaliinerit pissutigalugit Namminersorlutik Oqartussat suliffeqarfiutaat akiitsoqartorujussuupput.
Naalakkersuisut ukiumoortumik nalunaarusiartik naammassisimalerpaat, tassanilu Namminersorlutik Oqartussat ingerlatseqatigiiffiutaat 2024-mut naatsorsuutit kingulliit tunngavigalugit nalilersorneqarput.
Akiitsut ernialersukkat – sivikitsumik sivisuumillu atugassat – 12,1 milliarder koruuniupput. Aningaasat ingerlatseqatigiiffiit aningaaserivimmiititaat ilanngarneqarpata, akiitsut 10,582 milliarder koruunit missaanniipput.
Namminersorlutik Oqartussat aktianik piginneqatigiiffii pillugit ukiumoortumik nalunaarusiaq Inatsisartuni politikerinut agguaanneqaqqammerpoq.
Siuleqummi Naalakkersuisut siulittaasuannit Jens Frederik Nielsenimit allanneqartumi erseqqissarneqarpoq nalunaarusiaq piffissamut maanna atuuttumut naatsorsuusiuinnarani ukiumut 2024-mut ukiumoortumik naatsorsuutit kingulliit kisiisa tunngavigigai.
Anginerit tallimat pineqartut
Ukiumoortumik nalunaarusiami suliffeqarfiit annerit tallimat immikkut sammineqarput: Air Greenland, KNI, Royal Arctic Line, Royal Greenland aamma Tusass. Ingerlatseqatigiiffiit taakkua akiitsui 2020-mi 6,2 milliardit koruuniniit 2024-mi 8 milliardit koruuninut amerleriarsimapput.
Akiitsut ernialersukkat, ingerlatseqatigiiffinni tallimani aningaasat pigisat ilanngaatigereerlugit 7,4 milliardit koruuniupput, tassa ukiup siulianut sanilliullugu 300 millionit koruuninik amerlanerullutik.
Air Greenlandip timmisartuisa kilisaatillu aningaasartuutigisartagaat pissutigalugit akiitsut qaffassimapput, Air Greenlandimulli tunngatillugu suli naammassineqarsimanngilaq, ilaatigut timmisartunut inissiiviit allanullu aningaasaliisoqarnissaanik nalunaaruteqartoqarsimammat.
Kaaviiaartitat appariarnerat
Namminersorlutik Oqartussat ingerlatseqatigiiffiutaasa 13-it kaaviiaartitaat 2023-mi naatsorsuutinut sanilliullugu 12,798 milliardit koruuniniit 12,601 milliardit koruuninut appariarput. Tassani ingammik KNI Royal Greenlandilu kaaviiaartitaannik kingunerlutsitsipput, taakkua kaaviiaartitaat 258 aamma 174 millionit koruuninik appariarlutik.
Ajunngitsornaanulli qiviassagutta, Air Greenlandip kaaviiaartitai 87 millionit koruuninik amerleriarput, Royal Arctic Linellu kaaviiaartitai 39 millionit koruunit missaannik amerleriarlutik.
