Aaja Trumpimik tapersersuisumut isornartorsiuisoq

– Præsident Trumpip kalaallit ataqqingaarlugillu isumassorpai, nunarsuarmilu pissaaneqarnerpaap nunallu pisuujunerpaap pissaaneqarnerpaallu ikiorusummagit immikkut inissisimassapput.

Amerikami niuertoq Tom Dans Norgemi tusagassiorfimmut NRK-mut ataasinngormat Tromsømi ataatsimeersuarnermut Arctic Frontiersimut atatillugu taama oqarpoq.

Tom Dans Amerikamiut Kalaallit Nunaannik soqutiginninneranni pingaarnertut peqataasutut isigineqarpoq, Amerikamiullu Issittumi Ilisimatusarnermut Ataatsimiititaliarsuanni (USARC) siulittaasussatut Donald Trumpimit decembarimi toqqarneqarpoq.

Kalaallit “USA-mut ilaanertik pitsaanerussasoq paasissallugu piffissaqartinneqartariaqartut” Dans NRK-mut ilanngullugu oqarpoq.

Itigartitsisoq

Folketingimut ilaasortap Aaja Chemnitzip (IA), aamma Norgemi ataatsimeersuarnermut peqataasup, tamanna akerlerilluinnarpaa. TAssani marluullutik NRK-mi nutaarsiassiilluni aallakaatitsinermut peqataanerminni Tom Dans naapippaa.

- TV-kkut apersorneqarninnut atatillugu Tom Dans sivikitsumik naapissallugu periarfissaqarpunga. Kalaallit Nunaat tuniniagaanngitsoq erseqqissumik oqarpunga, taassumalu USA Kalaallit Nunaannik pisinissamut suli soqutiginnittoq oqaatigaa. Tamanna erseqqissumik itigartitsissutigaara, Aaja Chemnitz oqaluttuarpoq.

Tom Dans politikeri naapertorlugu kalaallit unammilligassaat USA-mit qanoq aaqqinneqarumaarnersut itisiliinani erseqqissarmagit uupakaatitsiniaasoq taanna isumaqarpoq.

- Nikassaalersoq

- Unammillernartut pillugit paasissutissat uupakaatitsiniaalluni atorneqartut uannut ersarippoq, Aaja Chemnitz Dansimik naapitsinini pillugu oqarpoq nangillunilu:

- Paasissutissat aalajangersimasut nammineq oqaluttuamut atorneqarput. Tamatuma kingunerisaanik kalaallit Danmarkimiittut Kalaallit Nunaanniittullu nikassarneqalerput. Taamatut suleqatigiinniarsarineq uggornarpoq.

Apeqqut: Kalaallit Nunaat USA-mut ilannguppat Amerikamiut ajornartorsiutinik aaqqiisinnaanerannut takussutissaqarpa?

- Naamik, unammillernartut tikkuarnissaat ajornannginneruvoq. Aammami aaqqiissutissarsiortoqartariaqarpoq, Amerikamilu peqqinnissaqarfik qimerlooraanni ingerlalluarnersoq takuneqarsinnaavoq. Kalaallit Nunaanni unammillernartitaqartugut amerlasuut isumaqatigisinnaavaat, aammali Danmark suleqatigalugu ilaatigut peqqinnissaqarfiup pitsaanerusumik aningaasalersorneqarnissaa pillugu aaqqiissutissanik ujartuivugut.