Aajuna isumaqatigiissut: Illersornissamut tunngasut aningaasaliinerillu nutaat Kalaallit Nunaata suleqatigisaanut killilersorneqassapput

Naalakkersuisut atsioqatigiinnermut atatillugu USA-mik Danmarkimillu isumaqatigiissut nittartakkaminni saqqummiuppaat.

Naalakkersuisut siulittaasuata Jens-Frederik Nielsenip (D) isumaqatigiissut pillugu erseqqissarpaa kalaallit namminneq aalajangiisinnaatitaanerat akuerineqartoq:

– Isumaqatigiissummi uagut inuiattut namminneerluta aalajangiisinnaassuseqarnerput akuersaarneqarpoq. Peqatigisaanillu Issittumi sillimaniarnermut ataatsimoorussamut peqataasutut akuersaarneqalerpugut, Jens-Frederik Nielsen oqarpoq.

Isumaqatigiissummi ilaatigut allassimavoq Naalagaaffiup nunap immikkoortuini oqartussaassusia ataqqineqartoq, tassa nunap immikkoortui oqartussaassuserlu tunniunneqanngillat.

Illersornissaqarfiit nutaat

Isumaqatigiissummi USA-p Kalaallit Nunaanni illersornissamut nutaamik sakkutooqarfimmik pilersitsisinnaanera uppernarsarneqarpoq, nutaanik pilersitsinissaq Kalaallit Nunaata Danmarkillu akuereqqaartariaqarpaat.

Narsarsuaq Mestersvigilu illersornissamut sakkutooqarfigineqarsinnaasutut taaneqarput, qanorli illersornissaqarfiit nutaat pilersinneqassanersut suli oqallisigineqarpoq.

Isumaqatigiissutip USA-mit nakkutilliinermi timmisartut Kalaallit Nunaannut missinnaanerat qulaavaasinnaanerallu uppernarsaqqinneqarpoq.

Amerikamiut umiarsuai illersornissamut pissuteqartumik isumaqatigiissuteqartoqarpat Kalaallit Nunaata imartaani angalasinnaapput.

Sakkutuut Kalaallit Nunaannut isersinnaanissaat inuiaqatigiit kalaallit soqutigisaannik eqqarsaatiginneqqissaarluni aalajangerneqassaaq.

Kalaallit suliffeqarfiutaat niuernikkut isumaqatigiissuteqarfigineqarsinnaapput, taamaallaallu Kalaallit Nunaata suleqatai aningaasaliisinnaapput

Isumaqatigiissummi nutaami aamma Kalaallit Nunaanni inuussutissarsiornerup siunissaa allaatigineqarpoq.

Aningaasaliisartut “Kalaallit Nunaata suleqatigisaannit” suliassaqarfinni mianernartuni “sunniuteqarluarsinnaapput”. Isumaqatigiissutip ilaa tamanna inatsimmi misissueqqissaarnermut tunngatillugu atuutilersitaasussami atuutilersinneqassaaq.

Aammattaaq isumaqatigiissummi allassimavoq USA-p illersornissamut tunngasunut tunngatillugu niuernikkut isumaqatigiissusiornerni kalaallit suliffeqarfiutaat siulliutinneqartassasut. Tamanna inatsisitigut pituttorsimavoq.

Piniarneq aalisarnerlu illersorneqassapput

1991-imi Igalikumilu isumaqatigiissummi avatangiisinut tunngasut inatsisitigut pisussaaffilerneqarput USA-llu illersornissamut immikkoortortaqarfiini tamani atuutilersinneqassallutik, taamaalilluni avatangiisit paarineqarumaarput.

Kalaallit Nunaat namminersulivissagaluarpat NATO-mut ilaasortaanini attatiinnassavaa

Isumaqatigiissummi allassimavoq nunat NATO-mut ilaasortaasut kisimik Kalaallit Nunaanni illersornissamut sakkutooqarfinnik pilersitsisinnaasut.

Kiisalu isumaqatigiissummi allassimavoq Kalaallit Nunaat namminiilissagaluaruni NATO-miiginnarniarluni aamma isumaqatigiissut atsioqatigiissutigineqartoq ingerlateqqinniarlugu neriorsuuteqassasoq.

Statsminister Mette Frederiksenip isumaqatigiissut pitsaanerarpaa:

– Ullumikkut isumaqatigiissutitsialak atsioqataaffigaarput. Kalaallit Nunaat, Kunngeqarfik Danmark USA-lu pillugit. Aamma NATO Europalu pillugit. Isumaqatigiissut tamatta illersornissatsinnut sillimaniarnitsinnullu ataatsimoorfigisatsinnut nukittorsaassaaq. Isumaqatigiissut NATO-mi suleqatigiinnermut attuumassuteqarluinnartoq. Isumaqatigiissummi Kunngeqarfiup Danmarkip nammineerluni oqartussaassuseqarfeqarnera, naalagaaffiup killeqarfiisa illersugaanerat kalaallillu namminneq aalajangiisinnaassuseqarnerat akuersaarneqarput, Mette Frederiksen oqarpoq.

Isumaqatigiissut tamakkiisoq Statsministereqarfiup nittartagaani atuarneqarsinnaavoq