Aalborgimiit Nuummut aasaanerani timmisartuussineq aallartittoq

Air Greenlandip aasaanerani Aalborgimiit Nuummut toqqaannartumik timmisartuussinera marlunngornermi aallartippoq.

Angallassineq ingammik danskinut takornariartunut kalaallinullu Danmarkimiittunut feeriarniarlutik nunatsinnukartunut iluaqutaasarpoq.

Jyllandip avannaani najugaqaraanni København aqqusaarnagu toqqaannartumik timmisartoraanni piffissamik sipaartoqarsinnaavoq – aamma Kalaallit Nunaannit tikikkaanni Nuummi mittarfiup isumannaallisaanermut tunngatillugu suli akuerisaannginnera pissutigalugu Kastrupimi toqqaannartumik timmisartunut allanut ikaarluni Københavnikkoortoqartariaqanngilaq.

Aarhusimi angalatitsiviup Ruby Rejserip Air Greenlandillu timmisartuussisarnermik suleqatigiillutik timmisartuussineq siorna aasakkut ammarpaat, Air Greenlandili kisimi ukioq manna timmisartuussissaaq.

Unammillernartut aaqqinneqartut

Taamatut aaqqissuussineq pissutigalugu siorna IT-mut, ilaasunut nalunaarsuinermut, timmisartumut ikisitsinermut, timmisartumi kiffartuussinermut assigiinngitsunut minnerunngitsumillu mittarfinni marlunni nassatanik isumaginninnermut tunngatillugu unammillernartorpassuit aaqqinneqarput. Taamaammat Aalborgimiit marlunngorpat ullup-qeqqanut ilaasut Nuummukaarnerminni ingerlalluarlutillu suna tamarmi pissusissamisupajaaq ingerlavoq.

Timmisartoq - kaffeqannginnera pissutaasorineqarluni - aallarnissaminut minutsinik 15-inik kinguaattoorsimavoq. Utoqqatsissut kikkut tamarmik paasilluarsinnaavaat, tassami kaffisortoqartariaqarpoq.

Timmisartumi saqisutsialaat Airsevenimi sulisut sungiusimannillutik ilorrisimaartitsipput, timmisartortartullu naalagaat Nørgaard takornariarpassuarnut timmisartup ingerlanerani takusassanik oqaluttuaqattaarpoq – aamma naak minnermi anorlerpallaaraluartoq suut tamarmik pilersaarutit malillugit ingerlapput, timmisartorlu minutsinik 20-nik sioqqutsilluni Nuummut mippoq.

Inissakittoq

Timmisartuussiffik timmisartortitseqatigiiffimmit Airsevenimit, Ruby Rejser-ip aamma piginnittorisaanit, timmisartuussiffigineqarpoq. Timmisartortitseqatigiiffik Boeing 737-800-mik 189-inik ilaasoqarsinnaasumik timmisartuussisarpoq – tamannalu aasaanerani timmisartuussinermi sanngiiffiunerpaavoq.

Timmisartoq taanna 12.500-nit amerlanerusunik assinginik timmisartoqartillugu nunarsuarmi timmisartut tunineqarnerpaat ilagaat – ilaasulli pinnagit timmisartortitseqatigiiffiit timmisartoq taanna nuannarinerugunarpaat. Tassami inissaqarpallaanngilaq – ingammik Air Greenlandip timmisartuutaani Tuukkami inissat angisuut sungiusimagaanni.

Airseven danskit angalatitsiviannit Travelheart Family-mit pigineqarpoq, taakkualu Ruby Rejser ukioq manna januaarimi pisiaraat – tamannalu angalatitsiviup Kalaallit Nunaannut takornarianik timmisartuussisarunnaarneranut pissutaasimagunarpoq. Akerlianik Air Greenland Ruby Rejserilu qanimut suleqatigiipput, taakkualu Nuummit Aalborgimut aasaanerani billetsit amerlanerpaartaat pisiarisimavaat, kalaallit timmisartortitseqatigiiffiat Sermitsiamut maajimi ilisimatitsivoq.

Nuummiit Aalborgimut marlunngornerit tamaasa septembarip aallaqqaataata tungaanut timmisartuussisoqartassaaq.