Aalisarnermi ingeniøri siulleq naammassisoq

Kalaallit Nunaanni aalisarnermi ingeniøri siulleq ilinniakkaminik naammassinnippoq. Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik tusagassiorfinnut allappoq.

- Edna Lyberth, Kalaallit Nunaanni aalisarnermi teknologi atorlugu diplomingeniøritut ilinniakkaminik siullersaalluni ulloq 19. juni 2026 naammassinnippoq, Naalakkersuisoqarfik allappoq.

Edna Lyberth Sisimiuni Danmarkimilu DTU Aquami ilinniarpoq.

Misilitsinneq nalliuttorsiutiginninnerlu Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmi pipput,

Naammassisoq ilinniartuunermini naalakkersuisoqarfimmi tassani suliffimmik misiliivoq ilinniartuunermilu nalaani ikiortitut sulilluni.

- Ednap diplomingeniøritut suliniutini Naalakkersuisoqarfik peqatigalugu allaaseraa, taannalu PNNP-p (Pisassiissutit Niuerutigineqarsinnaasut Nammineq Pigisat) aqutsiveqarfimmi 47-mi; Qeqertarsuup Tunuani, Uummannami aamma Upernavimmi umiatsiaararsortunut atuutilersinneqarneranut tunngasuuvoq, naalakkersuisoqarfik allappoq.

Naalakkersuisut pilluaqqusisut

Ilinniartitaanermut Naalakkersuisoq ilinniartup naammassinerani najuuppoq.

- Aalisarneq inuuniutitta pingaarnersaraat, taamaammat naalakkersuinikkut pingaartitaraarput aalisarnerup silarsuaani qaffasissumik iliniagaqarneq siuarsassallutigu. Edna illit nuannaarutigingaarpara tulluusimaarlungalu nunatsinni siullersaallutit aalisarnerup silarsuaani qaffasissumik ilinniagaqaleravit, pilluarujussuarit, Nivi Olsen (D), oqarpoq.

Aalisarnermut Naalakkersuisoq aamma pilluaqqusivoq. Taassuma pilluaqqussutini ima naggaserpaa:

- Aalisarnermut tunngasunik sulinerni pitsaanerpaamik atugaqarnissarnik kissaappakkit neriullungalu illit inuusuttut allat aalisarnermi ingeniøritut ilinniarusulernissaannut aalisarnermullu tunngasunik sulilerusulernissaannut isumassarsititsilluassasutit, Peter Borg (D), oqarpoq.