Aatsaat taama kiatsiginera Nuummi sisorartoqarsinnaannginneranik kinguneqartoq

Aput sisorarfimmi qeraarpaluttussaagaluarpoq, Nuullu qaqqaa inorasaartussaagaluarluni. Illuatungaanilli sisorarfik seqinnarimmit qinngorneqarluni kialaarpoq.

Kalaallit Nunaat allaanerusumik ukiuuvoq, aatsaallu taama kiatsigaluni. Taamaammat sisorarfik ammarneqarsinnaanngilaq.

Silap pissusianik ilisimatusartut oqaluttuarisaanermi aatsaat taama kiatsiginera eqqartorpaat, sisorartartut, klubbit ilaqutariillu kingunera malugaat - illoqarfimmi ukiuunerani ataatsimoorfiusartumi.

Ukioq aatsaat taama kiatsigaaq

Kalaallit Nunaat ukiuunerani qerinnartussaangaluartoq silasiutit kisitsisaat allaanerulluinnarput. Danmarks Meteorologiske Institutimi (DMI) silap pissusaanik ilisimatusartup Caroline Drost Jensenip ineriartorneq malinnaaffigilluarpaa, taassuma Kalaallit Nunaanni sila pillugu paasissutissanik ukiunilu arfineq-pingasuni suliaqarnermini assingusumik takunikuusimanngisaannarpoq.

- Kiarujussuaqattaarnera piffissami aalajangersimasumi takusimanngisaannarpara. Tamanna immikkuullarilluinnarpoq, oqarpoq.

Kiannerpaaffiit eqqartugai tassaapput Kalaallit Nunaata kitaata sineriaani agguaqatigiissillugu ukiup taamaalinerani aatsaat taama kiatsiginera. Paasissutissat Carolinep innersuussutigisai 1884-imiilli nalunaarsugaapput — DMI-p nalunaarsuisalerneraniilli. Ukiuuneranillu aatsaat taama kiatsigisut ilagaat Nuuk.

- Nuummi januaarip qaammataani kiassutsit agguaqatigiissillugit -0,2 gradiuvoq – Danmarkimiit januaarimi kiannera agguaqatigiissillugu -0,6 gradinit kiannerulluni. Nalinginnaasumik Nuummi januaarip qaammataani kiassutsit agguaqatigiisillugu -7,7 gradiussarpoq. Allatut oqaatigalugu: Nuummi maanna aatsaat taama kiatsigaaq. Kalaallit Nunaat pissusissamisuunngitsumik kiappoq, Caroline Drost Jensen nassuiaavoq.

Sisorartarfik innoqanngitsoq

Sisorarfiit-Skiliften inoqanngilaq. Qaqqap qaava seqinnarippoq sinaalu aputeqarani. Ingerlatsinermi pisortaq Qulu Heilmann seqinersiuteqarluni qaqqap sivingarnani sisorarfiup tungaanut tikkuaqqavoq. Majuartaat tassaniittaraluarpoq.

- Taamatut nalaataqarsimanngisaannarpugut, oqarpoq talinilu siaarlugit sisorarfiit qanoq silitsigisaraluarnera takutippaa.

Siorna majuartaat decembarip 30-ani ammarneqarpoq, Qulu suleqataalu nalinginnaasumik novembarimiilli apummik majuussuisaraluarput. Ukioq mannali aputeqanngikkallarpoq.

- Maannakkut ammaqqinnissatsinnut periarfissaqanngilaq. Qaqugu ammassanersugut aperineqartaraluarpugut, silalli qanoq innera apeqqutaaginnartoq kisiat akissutigisinnaavarput, Qulu oqarpoq.

Sisorarneq Nuummi ukiukkut inuunermut pingaaruteqarluinnarpoq, taamaattumillu majuartaatip matoqqanera illoqarfimmi sumi tamaani malugineqarsinnaavoq.

- Sisorartartut peqatigiiffiinut innuttaasunullu sunniuteqarpoq. Majuartaat ataatsimoorfiulluartarpoq, amerlasuullu meeraanerminnit eqqaamasaat tamaanngaanneerput. Ugguarnarnerpaat ilagaat unammisartut sungiusarsinnaannginnerat, Qulu anersaarululluni oqarpoq.

Sungiusartarnerit unikkallaqqasut

Aputeqannginnerata kingunerinik sisoraartinik sisupiloortartuullunilu sangusaartartoq Jesper Labansen. Sisorarneq sunngiffimmi sammisartangariinnarnagu ukiuuneranili ulluinnarni inuuneranut pingaaruteqarluinnartuuvoq.

- Sisoraatinik sangusaartartuunera inuuninni inituvoq, maannalu sangusaarnermut sungiusarsinnaannginnama aliasuutigaara, naak illoqarfimmi sisorartartut allat peqatigalugit GM-imut DM-imullu piareersarluareernikuugaluarluta, oqarpoq.

Jesper ukiup taamaalinerani kingusinaarluni aallartinneq qaqutigoortuusoq oqarpoq.

- Sisoraarnermik sungiusarnerit nalinginnaasumiik kingusinnerusukkut aallartinnikuunerat eqqaamasaqarfiginngilara. Ukioq mannali taamaannera kisiartaanngilaq, taamaakulaleriartorpoq, oqarpoq.

Taamaattumik majuartaatip pitsaanerusumik sinaakkusersorneqarnissaa ujartorpaa.

- Neriuppunga majuartaat nammineq aputiliummik peqalerumaartoq. Aamma majuartaatip eqqaani nuna iluarsaanneqarsinnaasuuppat iluaqutaassaqaaq, sisorarfiusup aallartinnginnerani kussinernk immiisarnerit pinaveersaartinneqarsinnaalissagamik. Sisoraatinik sangusaarneq siunissami toqqissisimanartuussappat ajoraluartumik ullumikkut atukkatsinnit pitsaanerujussuarmik atugassaqartinneqartariaqarpoq, Jesper Labansen oqarpoq.

Sisorarfik-skiliften-mi ingerlatsinermut pisortamit Qulu Heilmann takorluugaq isumaqatigineqarpoq.

- Aputiliuutinik pitaarnissarput kissaatitta annerpaartaraat. Issikkajuppoq aputeqaranili. Marlunnik issiliinnartoq aputiliuut atorlugit aputilersuisinnaagaluarpugut sisorarfillu ammatillugu, nassuiaavoq.

Qulu Heilmann suleqatinilu Norgemut isumassarsiorlutik angalannikuupput, tassanilu aputisiutit takusimallugit. Tanna Jesperlu qulanngillat: Aputiliuut sisorarfiup siunissaannut iluaqutaassaaq. Unammilligassarli tassaavoq akiisa qaffasinnerat. Aputiliuutit annertuumik aningaasaliiffiusussaapput – taamaalillunilu Kalaallit Nunaanni kiannerusumi ukiukkut sisorarnissamik aningaasaliinissamik misileerusuttunik pisariaqartitsisoqarluni.

Taamaammat Nuuk taama kiatsigaaq

Nuummi aatsaat taama kiatsigaaq, DMI-llu nalunaarutaa naapertorlugu arlalinnik pissuteqarpoq. Maannakkorpiaq Kalaallit Nunaanni kiassutsip allanngoriartornera pissutaalluni sila kiappoq Danmarkilu issilluni. Aamma anorsaartarnera soorlu aqqarsarneq - anori kiattoq qaqqamiit ammut sisusoq - sivikitsumik kiannerulertitsisinnaasarpoq. Nuummi januaarip aallartinnerani 11,3 gradit tikillugit kiappoq. Soorunami aamma silap pissusiata allanngoriartornera pissutaavoq.

- Silap pissusaata allanngoriartornera sukkatsikkiartorpoq, issittumilu tamanna sisamariaammik nunarsuarmiooqatitsinnik sukkanerusumik malugineqarsinnaavoq. Silarluttarnera silallu pissusaata allanngoriartornera akulerukkaangata, soorlu maannakkut tamanna misigingipput, naatsorsuutigisariaqarparput tamanna siunissami aqqusaaqqissallugu, silap pissusaa pillugu ilisimatusartoq Caroline Drost Jensen oqarpoq.

Aputininnissa ajoraluartumik ilimananngilluinnarpoq. DMI-mi silasiooq Lene Dolmer Nuummi allaffimminit sila malinnaaffigaa:

– Nuup avannaani annikitsunnguamik imaliliorsinnaanera ilimanarsinnaagunarpoq, kisianni sisorarfiup ammarnissaanut naammattumik aputininnissaa ilimananngilaq, nipaatsumik oqarpoq.

Sila pillugu ilisimatusartup Caroline Drost Jensenip Nuuk kisimi kiammit eqqugaanngitsoq oqarpoq.

- Kiannerpaaffiit nillernerpaaffimmiit amerlanerupput. Kalaallit Nunaata kitaata sineriaani tamarmi kiappoq, nalinginnaasumiillu allaanerulluinnarpoq – arlalitsigut aatsaat taama kiatsigisumik. Tamanna tupinnaqaaq, tamannalu Kalaallit Nunaanni ukiukkut silap qanoq ineriartortarneranut takussutissaavoq, naggasiivoq.

Nuummi sisorarfik inoqanngitsoq ukiukkut ajornartorsiutaaginnanngilaq. Silap pissusiata allanngoriartornerata Kalaallit Nunaanni ulluinnarni inuunermut qanoq sunniuteqarsinnaatigineranut takussutissaavoq. Ukiuusarnera allanngornersoq pineqaannanngilaq – inuiaqatigiilli siunissami aputeqarpiarunnaariartornissaannut qanoq naleqqussarsinnaatiginerat pineqarpoq. Kalaallit Nunaata kianneruleriartuinnarnerani Nuummi sisorarnissamik takorluugaq issittup, aningaasaliinerit silallu allanngoriartupallattarnerata akornanni oqimaaqatigiissaaruminaatsuuvoq.