Akit qaffakkiartornerat unikaallappoq – inuussutissanilli nioqqutissiat akii qaffariartitsisuupput

Ukioq manna juulip aallaqqaataata tungaanut akit qaffakkiartornerat kigaallilaarpoq.

Kalaallit Nunaanni Naatsorsueqqissaartarfiup kisitsisaataasa nutaat atuisunut akit takussutissiiviattut taaneqartoq juuli 2025-mit juuli 2026-mut 2,6 procentinik qaffattoq takutippaat.

– Nioqqutissat sullississutillu akii akimorlugit suli akit qaffakkiartornerannik, piffissanilli sisamanit kingullernit kigaannerulaartumik tamanna takutitsisoq, Naatsorsueqqissaartarfik allappoq.

Naatsorsueqqissaartarfiup atuisunut akigititanik takussutissiivik atuisup nalinginnaasup atueriaasia aallaavigalugu naatsorsortarpaa, taamaalillunilu takussutissiivik akit qaffakkiartornerannik malinnaanermut sakkuuvoq. Atuisut tamarmik akit qaffakkiartornerat assigiimmik misigineq ajorpaat, tamatumanimi inuit ataasiakkaat atueriaasiat apeqqutaasartoq erseqqissaatigineqarpoq.

Takussutissiivimmi ukiumi qaangiuttumi qaffariaat ingammik inuussutissanik nioqqutissianit il.il. kiisalu ineqarnermeersoq, naatsorsueqqissaartarfiup ilisimatitsissutigaa. Inuussutissanik nioqqutissat taamaalillutik ukiumi qaangiuttumi 3,5 procentimik qaffariarput, ineqarnermullu aningaasartuutit 2,3 procentinik qaffallutik.

Titartakkap tulliuttup januaarimit 2024-mit suliarineqartup akit qaffakkiartornerannut kisitsisit nutaanerpaat takutippai.

Naatsorsueqqissaartarfiup takussutissiivik ukiup affakkaartumik naatsorsortarpaa, uanilu naatsorsuinerit piffissami januaari 2026-mit juulimut 2026-mut 1,1 procentimik qaffariarnerat takutippaa. Tamanna ukiup affaata siulianit appasinneruvoq, tassanimi takussutissiivik 1,4 procentinik qaffariarmat.