Akunnittarfik ilisimaneqarluartoq aningaasarsiorniapiloortoq

”Nunarsuarmi akunnittarfiit sisamanik ullorialikkat avannarpasinnerpaartaat ataatsimiittarfeqarfialu tallimanik ullorialigaq.

Ilulissat Kangerluata, UNESCO-p nunarsuarmi eriagisassatut kingornussassanut allattorsimaffianiittup, saannguani inissisimasoq – taannalu ilinnut inuuninni puigunaatsumik misigisaqarusuttumut inornanngilaq.”

Taama akunnittarfik akimasooq, Hotel Arctic Ilulissaniittoq, Kalaallit Nunaata nunarsuarmi takornariarfittut ilisimaneqarnerpaaffiani inissisimasoq nittartakkakkut quppernermini imminut nittarsaappoq.

Suliffeqarfik Arctic Hospitality Corporation A/S, namminersorlutik oqartussat timmisartortitseqatigiiffianit Air Greenlandimit pigineqartoq, Ilulissanilu hotelimik pingaarnertut ingerlataqartoq ukiuni arlalinni aningaasanik iluanaarniapiloorpoq. Tamanna 2025-mut naatsorsuutini takuneqarsinnaavoq.

Ukioq kaajallallugu atorfiit 75-t

Arctic Hospitality Corporationip hotelinik, neriniartarfinnik kiisalu Ilulissani, Eqimi, nunaqarfimmilu Ilimanami illuaqqanik akimasuunik ingerlatsineq pingaarnertut suliaraa.

Hotel Arctic agguaqatigiissillugu ukioq kaajallallugu 75-inik sulisoqarluni Kalaallit Nunaata hoteliini nunarsuarmi ilisimaneqarnerpaavoq. Tamatumani minnerunngitsumik hotelimi minnerunngitsumillu illuaqqani atugassarititat pitsaasut, unnuinerillu, nerisaqarneq immikkuullarissunillu misigisaqarnerit akisuut pissutigalugit.

Siorna Arctic Hospitalilty Corporationip naatsorsuutai hurraartuutissaqqissutut eqqaamaneqarunnanngillat. Ingerlatseqatigiiffik aningaasarsiorniapiloorpoq. 

Arctic Hospitality Corporation 2025-mi taamaalilluni akileraarutinut akileereernermini 2,6 millionit koruuninik sinneqartoorpoq. Ajornerusimappulli. Ukiummi siuliani sinneqartoorutit 228.000 koruuniinnaallutik ajornipilussuupput.

Siorna hotelimi kaaviiaartitat niuernikkut isertugaapput, taakkuli ilanngaatissat sioqqullugit sinneqartoorutinit 51 million koruuninit annertunerujussuupput. Ukiup siuliani ilanngaatissat sioqqullugit sinneqartoorutit 45 million koruuniupput.

Akunnittarfiutilissuup ingerlatseqatigiiffia aatsaat taama sinneqartoortigisoq

Akunnittarfiutilissuup Helge Tangip ingerlatseqatigiiffia Hotel Hans Egede A/S Nuummiittoq Hotel Hans Egedemik Hotel HHE Expressimillu pingaarnertut akunnittarfiutitik 2025-mi ilanngaatissat sioqqullugit 89 millionit koruuninik iluanaaruteqartoq, akileraarutinik akileereerluni 39 millionit koruuninik sinneqartoorpoq.

Taamaalilluni akunnittarfiutilissuaq Arctic Hospitality Corporationimit aningaasarsiullaqqinnerujussuuvoq. Ilulissani ingerlatseqatigiiffiup akileraarutinut akileereerluni sinneqartoorutaa naammaginanngilaq, angusammi ilaa Iglo Lodgep ikuallassimasup sanaqqinneqarnerani naliliinermut atatillugu immikkut ittumik isertitaavoq.

Taama Arctic Hospitality Corporationip pisortaaneri pisortamit Morten Nielsenimit siulersorneqartut 2025-mut ukiumut nalunaarusiaminni allapput.

Sinneqartoorutit naammaginanngitsut ingerlatseqatigiiffiup piginnittaata Air Greenlandip SAS-illu Danmarkip Ilulissallu akornanni Nuuk aqqusaarlugu qaffasissumik timmisartuussinermi akigititaqarneranik ilaatigut patsiseqarput. Tamanna hotelimik ingerlatsisumi tunisat kaaviaartitallu appasinnerunerannik malitseqarpoq. 

Ataatsimeersuartarnerit Nuummi eqiteruttut

2025-mi ataatsimeersuartarnerit annertunermik Nuummi eqiterupput, ersarinnerusumik oqaatigalugu akunnittarfiutilissuut Hotel Hans Egedeutaani. Tamanna Hotel Arcticip ataatsimeersuartitsinernik tunisaanut sunniuteqarpoq.

- Siorna 4 aamma 5 million koruunit missaannik sinneqartoornissarput naatsorsuutigisimagaluarparput.

- Hotel Arcticip World of Greenlandillu kattunnerannut atatillugu takornariartitsinermik tunisassiat tamakkerlugit tunniuppagut, qajariartitsisarnernit Ilulissallu Kangerluani angalaartitsisarnernut piffimmi angallassinerit ilanngullugit.

- Taamaalilluta kaaviiaartitat annertuut annaavagut. Tamanna 2025-mi uatsinnut eqquivoq, Arctic Hospitality Corporationimi pisortaq Morten Nielsen naatsorsuutinut oqaaseqarnermini Sermitsiamut oqarpoq.

Arctic Hospitality Corporationimi aningaasaqarnikkut kinguariarneq aamma Danmarkillu Ilulissallu akornanni timmisartuussinerit akisunerunerannik patsiseqarpoq – kiisalu Nuup Ilulissallu akornanni – taakkulu Nuummi mittarfittaamik patsiseqarput.

Tamanna Arctic Hospitality Corporationip naatsorsuutigisamit annikinnerusumik tunisaqarneranik kinguneqarpoq. 

- Sullitat aningaasallu qanoq amerlatigisut annaasimanerlutigit eqqoriarsinnaanngilara. Hotelimi takornariat ataatsimeersuartitsinerillu siorna annaasaqarfigaagut. Kaaviiaartitani isertitanilu annertuumik appariartoorpugut, Morten Nielsen oqarpoq.

Akerlianit Danmarkimit Nuummut timmisartorneq akikinnipilussuanngorpoq.

Arctic Hospitality Corporationip ukioq manna 2025-mut sanilliullugu qaffasinnerulaartumik sinneqartoornissaq naatsorsuutigaa. Taamaalillunilu Ilulissani akunnittarfik Tangip akunnittarfiutaatulli aningaasanik qalooriffiussanngilaq.