Allagaatini nutaani allassimasut naapertorlugit Trump Epsteinip timmisartuanut arfineq-pingasoriarluni ilaasimasoq

USA-p præsidentia Donald Trump kinguaassiuutitigut atornerluisimasup toqukkut qimagutereersup Jeffrey Epsteinip nammineq timmisartuanut 1993-imit 1996-imut minnerpaamik arfineq-pingasoriarluni ilaasarsimavoq.

Tamanna eqqartuussivimmi unnerluussisussaatitaasup ikiortaata, kinaassutsiminik isertuussisup, e-mailimi nassiussaani ersersinneqarpoq. E-mailimik nassinneqartup kinaanera aamma erseqqarluppoq.

E-maili taanna allagaatit Epsteinimut tunngasut tusindilippassuit USA-mi inatsisinik atortitsinermut ministereqarfiup marlunngornermi saqqummiussaasa ilagaat.

Januaarip arfineq-aappaanni 2020-mi nassiunneqarsimavoq, qulequtaaraanilu allassimalluni Epsteinip timmisartumik angalasarnerinut nalunaarsukkanut e-mailinut ilanngunneqarsimasoq.

Timmisartornerit ilaat pillugu allassimavoq Trump Epsteinilu arnaq 20-nik ukiulik kisiat ilagalugu timmisartorsimasut.

Arnap 20-nik ukiullip taassuma aqqa allagaatini eqqaaneqanngilaq.

Unnerluutiginnittup e-mailimik nassitsisup ilanngullugu itisiliilluni oqaatigaa, timmisartornerit nalunaarsorneqarsimasut naapertorlugit, siusinnerusukkut oqaatigineqartunit Trump Epsteinip timmisartuutaanut amerlanerujussuariarluni ilaasarsimasoq, (imaluunniit paaseriikkatsinnit amerlanerusunik).

Trumpip Epsteinip timmisartuanut minnerpaamik arfineq-pingasoriarluni ilaasorineqartarnerani Ghislaine Maxwell minnerpaamik sisamariarluni aamma ilaasimavoq.

Epsteinip suleqataa ikiortaalu Maxwell Epsteinip niviarsiaqqanik ukiukitsunik kinguaassiuutitigut atornerluiniarluni pissarsiniarnerani ikiuuttarsimanini pillugu ukiuni 20-ni parnaarussaaqqavoq.

- Timmisartornerni allani marlunni arnat marluk ilaapput, taakkulu suliamut Maxwellimut tunngasumut ilisimannittuusinnaagaluartut, allagaatini allassimavoq.

Trumpip Epsteinimik 1990-ikkunni timmisartoqateqartarsimanera pillugu e-mailinut tunngatillugu Reutersimit oqaaseqartitserusuttoqarmat, præsidentip illorsuanit Det Hvide Husimit tutsaqartoqanngilaq.

/ritzau/