Allakkat ammasut: Nanortalik pingaartinneqanngilaq
Nanortallip Atuarfiani suli oqummik ajornartorsiuteqartoqarpoq, atuarfiullu tamarmi ammaqqinnissaanik sulissuteqarneq kigaappoq. Tamanna kommunalbestyrelsimut ilaasortap Pipaluk Jakobsen Larsenip oqaluuserisassatut siunnersuutaanut ilaavoq. Borgmesteri kommunimi suliassat pisariaqartut eqqumaffigineqartut neriorsuivoq.
Inuit Ataqatigiit sinnerlugit Kommune Kujallermi kommunalbestyrelsimut ilaasortap Pipaluk Jakobsen Larsenip oqaluuserisassatut siunnersuutini pimoorunneqanngitsutut misigaa.
Assi: Kommune Kujalleq
Nanortalimmi meeqqat atuarfiat oqummik eqqugaavoq, saaffiginnissutillu arlaqartut qisuariarfigineqarneq ajorput.
Kommune Kujallermi kommunalbestyrelsimut ilaasortaq Pipaluk Jakobsen Larsen (IA) borgmesterimut Malene Vahl Rasmussenimut (D) ammasumik allagaqarnermini ilaatigut taama oqariartuuteqarpoq.
Kommunalbestyrelsimi ilaasortap siunnersuutini kommunalbestyrelsimi suliarineqanngitsutut misigai.
- Maanna aamma Nanortalimmi kialaarfiup pilersinnissaa siunertaralugu borgmesteri saaffigisaraluarlugu akineqanngivissorpunga, tamanna uggornarluinnarpoq.
- Kommunalbestyrelsimi ilaasortatut oqaluuserisassanngortitakka ataatsimiititaliani ingerlareersut piviusunngornissaanut ilaatinneqanngillat, tamanna aamma innuttaasunut uggornarluinnartuuvoq. Sooq taava kommunalbestyrelseqassaagut nammineq kisimi aqutsiniaraanni?
Atuarfiup ilaa suli matoqqasoq
Nanortallip Atuarfiani atuartut ilinniartitsisullu atuarfiup oqoqarnera pillugu akerliussutsimik takutitsillutik aqqusinikkut ukiup ataatsip matuma siorna ingerlaaqatigiipput.
Atuarfillu silaannalummat ukioq mannalu marsimik matuneqarpoq. KNR taama allappoq. Atarfiullu ilaa suli, ulloq manna
tikillugu, suli oqoqarpoq.
Pipaluk Jakobsen Larsen naapertorlugu atuarfiup ammaqqinneqarnissaanut suliaq ataatsimiititaliami suliarineqarnissaa kinguartinneqarpoq.
Nanortallip Atuarfia saaluallaqalersimanera pissutigalungu juullimi atuanngiffeqarnissaq sioqqullu tamarmi maanna matuneqarpoq.
Atuarfilli kisimi unammilligassaqanngilaq. Pipaluk Jakobsen Larsenip Qaqortumi mittarfittaarnissaanut innuttaasunik ataatsimiititsinerni Narsamut Narsarsuarmullu qanoq kinguneqassanersoq kisimik eqqaaneqarmata, Nanortalimmut kingunerisinnaasaasa eqqartornissaat amigaatigaa.
Taassuma kommunalbestyrelsimi qinikkatut borgmesterip ilaasortanik peqataatsitsinerulernissaa kissaatigaa.
Borgmesteri: Suliaq aallartippoq
Sermitsiap Kommune Kujallermi borgmesteri Malene Vahl Rasmussen (D) isornartorsiuinermut akissuteqartippaa. Nanortalimmi meeqqat atuarfiata nutarterneqarnera ingerlasoq, atuarfiullu ilaa aasaq manna ammarneqartoq, Malene Vahl Rasmussen nassuiaavoq. Illulli ilaa suli oqoqarmat matoqqavoq:
- Atuarfitoqqap naqquani kiassaateqarfik oqoqarmat iserfigineqaqqusaajunnaarlunilu matuneqarpoq. Oquup illup sinneranut siaruaannginnissaa
qulakkeerniarlugu iliuuseqartoqarpoq.
- Kommunalbestyrelsimi aningaasanik immikkoortitsisoqareerpat iluarsaassineq nutarterinerlu aallartissinnaassasut naatsorsuutigaarput. Taamaattumik eqqortuunngilaq oqassalluni atuarfik matoqqasoq (oqunneq pissutigalugu, aaqq.) – suliassat pisariaqartut tamaasa suliarivavut, Malene Vahl Rasmussen oqarpoq.
Aasaanerani sulinngiffeqarneq kommunimilu pisortat taarseraannerat pissutigalugit ingerlatsiviit politikkerillu akornanni sulineq oqaloqatigiinnerlu unittooqqasimasut, aamma ilisimatitsissutigaa.
- Maannakkut suliat sumut killinnerannik misissuisoqarpoq, oqarpoq.
Malene Vahl Rasmussenip kommunip aningaasaqarnera ilungersunartoq nassuerutigaa, kommunilli karsiata pitsaanerulersinnissaa sulissutigineqarluni. Pipaluk Jakobsen Larsenip kommunimi unammilligassat aaqqinniarlugit kommunalbestyrelsimi suleqatigiilluarnissamik kissaateqarnera borgmesterip aamma isumaqatigalugu erseqqissarpaa.
