Amerikamiut aningaasaliisartoqatigiit Jørgen Wæver Johansenip illusineranut 5,4 mio. kr-nik akiliisut

Ukioq manna juunip 23-iani Nuummi illumik tuniniaasoq, inuussutissarsiutinik ingerlatsisumik, siusinnerusukkut naalakkersuusimasumit, Vivian Motzfeldtillu inooqataanik Jørgen Wæver Johansenimik illumik pisinissamik isumaqatigiissuteqareernermini, aningaasaliisartoqatigiinnit Greenland Development Partners LLC-mit 5.388.954 kr-nik tigusaqarpoq.

Aningaasaliisartoqatigiit Greenland Development Partners LLC-p siusinnerusukkut qulaajarneqareersutulli, suliffeqarfiup Donald Trumpimik illersuisumut aningaasaatilissuarmullu Ronald Lauderimut atassuteqarnertik immikkuullareqqutigaat.

Taamattaarlu inuussutissarsiornermik ingerlatsisoq 88-nik ukiulik, Trumpip siusinnerusukut isumannaallisaanermut siunnersortigisimasaa John Bolton malillugu, aamma Trumpip Kalaallit Nunaannik tigusinissaanik isumassarsisuuvoq.

Weekendavisenip marlunngornermi aningaasanik nuussinermut uppernarsaammik tigusaqareernermi kingorna illumik pisineq qulaarpaa.

Maani Sermitsiaq.AG-mi aamma suliaq misissorparput, Weekendavisenimisullu aamma illumik pisinermut illumillu tunisisumik, kinaassutsiminik isertuusserusuttumik ilisimasaqarluta.

Inuit Properties Greenlandimut tunniunneqartoq

Sermitsiap paasissutissat pigisai malillugit illumik tuniniaasoq maajip 23-iani Jørgen Wæver Johanseimik illumik pisinissamik isumaqatigiissuteqarpoq. Tunisinerli sivitsoruttoorpoq, aningaasallu kingusinaarluni akilerneqartut, Weekendavisen allappoq – tamannalu aamma illumik tunisisup Sermitsiaq.AG-mut oqaluttuaraa.

Tuniniaasup aatsaat Jørgen Wæver Johansenimik nukingisaarereernerani aningaasat tamakkiisut nuunneqarput. Nuussinermtu uppernarsaammi Greenland Development Partners LLC, New Yorkimi Lexington Avenuemi adresseqartoq nassitsisutut allassimavoq. Taamaalillunilu tunisineq naammassivoq.

Arnaq kingorna illumik misissuiartortinneqartunilu piareersaanermik ingerlatsisoq tassaavoq aningaasaliisartoqatigiit siuttuat USA-milu nunanut allanut ministerimut tullersortaasimasoq, Josette Sheeran. Taama tuniniaasoq Weekendavisenimut oqaluttuarpoq, tuniniaasorlu aamma taama Sermitsiaq.AG-mut oqaluttuarpoq.

AAMMA ATUAKKAT

Amerikamiut aningaasaliisartut imermut suliniummut atatillugu maluginiarneqartut

Jørgen Wæver Johansenip Weekendavisenimut illumik pisineq uppernarsarpaa, tassungalu ataillugu Trumpimut illersuisoq Ronald Lauder inuttut aningaasaleeqataannginnerarlugu. Jørgen Wæver Johansenip suleqatigiinnernik pilersitsinernik suliaqarluni Kalaallillu Nunaata ineriartorneranut aningaasaliisunik kajumilersitsinermik suliaqarluni, illumillu aningaasalersuineq kalaallimit nammineq aningaasaatinik kalaallinillu suleqatinillu taarsigassarsianik akuleriissillugu pisoq oqaatigaa.

Illuutinik niuerneq uppernarsarneqartussaavoq, pappiaqqanilu, Sermitsiaq.AG-p takusaani, illu tunineqarnermini Inuit Properties Greenland ApS-mit qularnaveeqquserneqartoq takuneqarsinnaavoq. Ingerlatseqatigiiffik pisinermik isumaqatigiissuteqarnerup kingorna ullualunnguit qaangiuttut pilersinneqarpoq, tamakkiisumillu Jørgen Wæver Johansenimit pigineqarluni.

Sermitsiaq.AG Jørgen Wæver Johansenimut saaffiginnippoq, illullu pisiaata qanoq atorneqarnissaanut itisiliilluni akissut utaqqillugu.