NALILIINEQ
Amerikamiut peqatigalugit ataatsimiinnerit isertuussat
Nalinginnaasumik amerikamiut naalakkersuisuisa sinniisuisa nunatsinnut tikeraarnerat arajutsisassaanngilluinnartaraluarpoq. Kisianni maannakkut amerikamiut Danmarkimi aallartitartaavata tikeraarnera nipaalluinnartumik ingerlanneqarpoq, pingaartumik aamma nunatsinnut amerikamiunullu pingaaruteqartunik Permanent Committee-mi aamma Joint committee-mi ataatsimiinnerit nipaarsaarunneqarput.
Ataasinngormat Joint Committee ataatsimiippoq tamatumalu kingorna avammut nalunaarummik saqqummiussisoqarluni, suleqatigiinnerup nukittorsarneqarnissaa aammalu "kingullermik 2020-mi Pituffik pillugu paasisitsiniaanermut tapertaasussamik USA-p Kalaallit Nunaatalu akornanni suleqatigiinnermut ataatsimoorussamik iliuusissatut pilersaarut" atuutilersinneqarsimasoq nanginneqarnissaa pillugu innersuussutigineqarluni. Assimi takuneqarsinnaapput Amerikap Danmarkimut aallartitarisimasaa Carla Sands aammalu Naalakkersuisut siulittaasorisimasaat Kim Kielsen suleqatigiinnermut nalunaarutertik Qaqortumi ukiakkut 2020-mi atsiornerat sioqqullugu.
Asseq: Amerikamiut Danmarkimi aallartitaqarfiat
Nalinginnaasumik nalliuttorsiorpalaarneqartarpoq Kalaallit Nunaat avataaneersunit tikeraarneqaraangat, pingaartumik USA-mit Europamilu ikinngutigiittut qanitatut suleqatigisartakkanit, tassanilu tusagassiortunik katersortitsinerit aaqqissuussinerillu pitsaasunik assiliinissamut periarfissiisut amigaataasanngillat.
Taamaakkaluartoq matumani tikeraartoqarnera nipaarsaarutigineqarluinnarpoq. Pisortatigoortumik aaqqissuussaqanngilaq aamma tusagassiortunik katersortitsisoqanngilaq, tusagassiorfiit kiffaanngissuseqarlutik ataatsimiinnerit imarisaat angusallu pillugit apeqqarissaarfigisinnaasaannik. Ataasinngornermi tusagassiorfiit "matup killingani tusagassiortunik katersortitsisoqarnissaanut" qaaqqusaapput, tassanili tusagassiortut apeqquteqarnissamut periarfissaqartinneqanngillat.
Trumpip Kalaallit Nunaannik pisinissaminik pilersaaruteqarnerata kingorna USA-p, Danmarkip Kalaallit Nunaatalu akornanni attaveqaatit suli ajornartorsiuteqarfiunerannut tamanna takussutissiiva?
Imaluunniit nunatsinni Naalakkersuisut ajornakusoortippaat akunnermiliuttuunissartik, Danmarkip USA-llu akornanni attaveqaatinik pitsaanngitsup tungaanut allannguutaasumik ajornartorsiuteqarnerannut?
Imaluunniit allamik nassuiaatissaqarpa ulluni makkunani ataatsimiinnernut tunngatillugu matoqqasumik ingerlatsinermut?
Ukiut tallimat matuma siorna isumaqatigiissummik pujoralaajaaneq
Tikeraartoqarneranilli anillattoqalaarpoq, ataasinngornermi Joint Committee-mi ataatsimiinnerup kingorna Naalakkersuisut amerikamiullu aallartitaasa ataatsimoorlutik nalunaarutigaat "ukioq manna ataatsimiinnermi ataatsimut soqutigisatsinnik suleqatigiinnitsinnillu aallaaveqartumik illuatungeriilluni ataqqeqatigiinnermik toqqammaveqartumik nukittuumik siunissamullu sammisumik pimoorussinermik uppernarsaqqinneq" anguneqarsimasoq.
Ataatsimoorlunilu avammut nalunaarnermi innersuussutigineqarpoq 2020-mi iliuusissatut pilersaarut (dk), taamani amerikamiut Danmarkimi aallartitaata, Carla Sandsip aamma taamani Naalakkersuisut siulittaasuat, Kim Kielsenip atsiugaat Qaqortumi ukiakkut 2020-mi.
Sermitsiamit nunanut allanut tunngasunut naalakkersuisumut Vivian Motzfeldt-imut aamma amerikamiut aallartitaannut Ken Howery apeqqutigerusutatta ilagigaluarpaat isumaqatigiissummi innersuussutigineqartumi 2020-meersumi naammassisimasatut naqissuserneqarsinnaasut qassiunersut minnerunngitsumillu aamma isumaqatigiissummut ilassuteqartoqarsimanersoq, kisianni suli Hans Egedep illuanit avammut nalunaaruteqartoqanngilaq tusagassiortullu apersuinissaminnut suli periarfissaqartinneqanngillat.
Marlunngornermi Permanent Committee-mi ataatsimiinneq ingerlanneqarpoq, tassanilu peqataapput Kalaallit Nunaanni naalakkersuisut, Danmarkimi naalakkersuisut kiisalu amerikamiut naalakkersuisut sinniisaat Nuummi.
Naalakkersuisut oqaaseqartinniarlugit Sermitsiamit suli sulissutigaarput.
