Amerikamiut rakettinik igeriuttakkanik Kalaallit Nunaanniititsilissappata russit qisuariarfigissavaat
Ruslandimi ministeri USA Kalaallit Nunaanni rakettinik igeriuttakkanik amerlasuunik inissiissappat qisuariartoqassasoq oqarpoq.
Sergej Rjabkov USA Kalaallit Nunaanni rakettinik igeriuttakkanik inissiissappat Rusland qisuariassasoq oqarpoq. (Toqqorsivimmit).
Assi: Anastasia Barashkova/Reuters/Ritzau Scanpix
USA Kalaallit Nunaanni rakettinik igeriuttakkanik illersuutissatut amerlasuunik inissiippat, Rusland qisuariartariaqarsinnaavoq.
Ruslandimi nunanut allanut ministerip tullia Sergej Rjabkov marlunngornermi russit nutaarsiassaqartitsiviannut RIA-mut oqartoq, Reuters allappoq.
- Amerikamiut sakkutuuisa illersornissamut atortui Kalaallit Nunaanni amerlasuut inissinneqassappata, Rusland iliuuseqartoqarsinnaavoq, Sergej Rjabkov oqarpoq.
USA-p præsidentiata Donald Trumpip Issittumi isumannaallisaanerup nukittorsarneqarnissaa anguniarlugu Kalaallit Nunaat "pigisariaqarlugu" arlaleriarluni oqaatigaa.
Danmarkip Kalaallit Nunaatalu USA-p Kalaallit Nunaannik tiguaanissaa itigartitsissutigiuaannarpaat.
Atomimik sakkussiat pillugit isumaqatigiissut qaangiuttoq
Nunanut allanut tunngasunut ministerip Lars Løkke Rasmussenip (M) nunanullu allanut tunngasunut naalakkersuisup Vivian Motzfeldtip Washington D.C-mi januaarimi ataatsimeeqatigiinnerisa kingorna suleqatigiissitaliortoqarpoq.
Danskit naalakkersuisui USA-mut illersornissamut isumaqatigiissutip Kalaallit Nunaat tunngasup 1951-imeersup ilanissaa piareersimaffigalugu nalunaarutigereerpaat.
USA-p Ruslandillu atomimik sakkussiat pillugit isumaqatigiissutaat sisamanngorpat qaangiulluni atorunnaassaaq.
Isumaqatigiissut New Start 2010-mi atsiorneqarpoq, tassanilu naalagaaffiit pissaanillit taakku marluk illoqarfinnut sakkutooqarfinnullu imminnut tikkuussisinnaasut qanoq amerlatiginissaat killilerneqarnikuuvoq.
USA qisuarianngitsoq
Ruslandip præsidentiata Vladimir Putinip killilersuinerit maanna atuuttut ukiumik ataatsimik sivitsorneqarnissaat siunnersuutigaa, Donald Trumpilli siunnersuut suli akinngilaa.
Sergej Rjabkov Rusland isumaqatigiissummik sivitsuinissamik piareersimasoq marlunngornermi uteqqippaa, USA-miilli suli tusagaqartoqarsimanani.
- Akissuteqannginneq aamma akissutaavoq, nunanut allanut tunngasunut ministerip tullia Ruslandimi naalagaaffiup tusagassiorfianut Tass-imut oqarpoq.
Sergej Rjabkov Rusland atomimik sakkussiaat killilersorneqanngitsut atulernissaannut piareersimasoq aamma oqarpoq.
/ritzau/
