Anaana kiap paaraa? 

Erninermut atatillugu sulinngiffeqarnermut tunngatillugu eqqumiigisaqarpunga. Naalungiarsuunngitsoq. Meerartaaqqammersup ingerlaannaq puigorneqartarnera pivara.

Allanngorneq eqqumiippoq.

Naartunermi arnap timaa eqqumaffigineqartorujussuusarpoq. Nakkutigineqartarpoq, malinnaavigineqartarluni paarilluaqqissaarneqarlunilu. Misissorneqartarpoq, oqaloqatigiinnerit pisarput erninermilu naalungiarsuup isumannaatsumik inunngornissaanut pilersaarusiortoqartarluni.

Sapaatit-akunnialui matuma siornatigut uangattaaq taamatut sullinneqarpunga.

Ernereerlunga naalungiarsuutiga maanna maaniippoq.

Soorlu pissusissamisoortoq, nerisarnera, naajartornera ingerlalluarneralu maluginiarneqartarput.

Eqqarsaatiginngitsoorsinnaanngisarali tassaavoq.

Anaana kiap paaraa?

Aappassaannik ernininnut atatillugu sulinngiffeqarninni apeqqut taanna eqqarsaatigerusaarpara. Uannut tunngaannanngilaq. Inuiaqatigiinnili periusitsinnut tunnganerusoraara.

Kalaallit Nunaanni ernineq oqaluuserineqartaqaaq.

Arnat sumi ernisinnaanersut oqaluuserisarparput. Illoqarfitsik qimallugu erniartortut. Ungasissumiinneq, silap qanoq innera aamma peqqinnissaqarfimmi qanoq sullinneqarsinnaanermut periarfissat.

Sammisat taakku pingaaruteqarput. Nunamimi najugaqarfiit imminnut ungasinnerat pissutaalluni erninissaq kisimi pineqarneq ajorpoq. Angalanissaq, ilaquttat aamma inuunermi pisariaqatitsinerpaaffiup nalaani angerlarsimaffimmut ungasissumiittariaqartarneq.

Meerarli inunngoreeraangat oqaloqatigiinneq annikinnerulertarpoq.

Arnaq ernereernerup kingorna qanoq pisarpa?

Angerlareernermi kingorna.

Ulluinnaat aallarteqqikkaangata.

Pulaartut anereeraangata anaanaq timiminik sakkortuumik aqqusaagaqaqqammersoq inoorlaajutiminik kisimeeqateqalersarpoq.

Danmarkimi ministeriunerup Mette Frederiksenip ukiortaami oqalugiarnerata kingorna, arnat erninerminni timimikkut ajoqusersimanerminnik anniaateqartut, sipissimasut allatigulluunniit ajoqusersimasut pitsaanerusumik ikiorneqarnissaminnik pisariaqartitsisut pillugit oqallittoqalerpoq.

Arnap arlaannaataluunniit anniarnerit kingunerlutsitsinerillu allat pillugit ikiorneqannginnini akuerissanngilaa.

Immaqali aamma taanna oqallisigineqarsinnaavoq.

Ernineq ingerlalluarsimappat tassunga killittoqaannarneq ajorpoq.

Meeqqap erniuneraniit allanngortoqartarpoq. Ilaqutariinniinnaanngitsoq, arnami aamma.

Inuk nutaaq ilinniartussaavaa. Kinaassutsini allanngortoq akueriniartussaavaa. Ulluinnarmini qanoq iliornissani ujartussavaa, ulluinnaat nutaat asanninnermik, qularnermik qasunermillu imallit.

Timaatalu sulinini ingerlattussaallugu.

Illissap eqikkariartornerani timi erninerup kingorna mamisartussaavoq. Suliassarlu nutaaq takkuttarpoq: milutsitsineq.

Taakku imminnut paarlakaajaapput. Timip suliassarujussuisa akornanni unilaarfeqanngilaq.

Tamannalu immaqa pissutigalugu erninerup kingorna unammilligassat ilaat takuneqarsinnaaneq ajorput.

Ilaat timimiipput.

Allat eqqarsaatiniipput.

Inuttut imminut ilisarisinnaannginnermi misiginermiipput.

Ernereernerup kingorna sulinngiffeqarneq sulinngikkallarnertut oqaluuserisarparput. Ulluinnarnut uteqqinnissap tungaanut meeqqamik isumaginniffiusutut.

Erninereernerulli kingorna sulinngiffeqarneq unilaarfiunngilaq.

Allanngortoqarnerani ikaarsaarfiuvoq.

Inuunermi allannguinerit annerpaat ilagaat.

Meeraq ullormi ataatsimi erniusarpoq.

Anaanaq piffissaq sivisunerujussuaq atorlugu ikaarsaartarpoq.

Imaanngilaq anaananngorneq ajornartorsiutitut isigineqalissasoq. Illuatungerluinnaraa. Amerlasuut inuunerminni pingaarnerpaatut pisutut isigisarpaat. Uanga ilanngullunga.

Inuunermili allanngortoqarujussuartoqartillugu isumassorneqarnissaq pisariaqartinneqartarpoq.

Inoorlaat ikiorneqarnissartik illersorneqarnissartillu pisariaqartikkaat ilisimavarput. Naalungiarsuup nammineersinnaannginnera nalunngilarput.

Isumassuisoq aamma isumassorneqarnissaminik pisariaqartitsisarnera ilaannikkut puigortarparput.

Taamaattumik meeqqap qanoq ililluni isumannaatsumik inunngornissaa kisiat eqqarsaatiginissaa naammanngilaq.

Erneqqammersup qanoq paarinissaa aamma eqqarsaatigisariaqarunarparput.

Ulluni siullerniinnaanngitsoq.

Aammali sapaatit-akunnerini qaammatinilu tulliuttuni.