Angut 19-inik ukiulik marloriarluni toqutseriarsimasutut unnerluutigineqarpoq — unnerluussisussaatitaasup killiligaanngitsumik paarnaarussassanngortinneqarnissaa ujartorpaa

Eqqartuussiveqarfik Sermersuumi angut inuusuttoq qernertumik tujuuluaraqarluni tamorasaartorpoq. Unnerluutigineqartullu taagorneqarnerani eqqissilluni issiavoq.

Angutip 19-inik ukioqalereersup, unioqqutitsineri amerlaneri pissutigalugit eqqartuussiviup suliaq tamaat ulluni tallimani misissussavaa.

Eqqartuussinerit ataasinngornikkut ullut pingajussaat ingerlanneqarpoq, aallaqqaataaniillu pingaarutilimmik paasitinneqarpugut: Unnerluussisussaatitaasup oqaatigaa unnerluussisussaatitaasut angutip inuusuttup killiligaanngitsumik paarnaarunneqarnissaa kissaatigigaat.

Killiligaanngitsumik paarnaarussassanngortitsineq inatsisitigut pillaatisiatut sukannernerpaavoq, pinerlunnianullu immikkut ulorianaatilinnut killiligaanngitsumik pillaatisiarineqartarpoq.

Angut unnerluutigineqartoq marloriarluni toqutseriarsimasutut 2025-mi juunip 27-ani unnerluunneqarpoq. Unnerluussut naapertorlugu Nuussuarmi biilit uninngasarfianni arnat marluk biiliniittut aallaallugit toqunniarsimagaluarpai.

Kiinaat, sakiaat taliilu ajoquserneqarput, pilertortumillu nakorsamit ikiorneqarput. Unnerluussut naapertorlugu ilisimaneqanngitsumik pinerliiniarnermini peqateqarsimavoq.

Toqutseriartutut taanna pinngitsuunerarpoq. Timmiarsiummilli seqqorsimanini nassuerutigaa, toqutsinissarli siunertarinagu ersisaarinissani siunertarisimallugu pisup kingorna sapaatip-akunnera qaangiuttoq killisiorneqarnermini, oqaluttuarpoq.

Aallaasersornerup nalaani arnat 5 miterisut ungasitsigisumi issimasut unnerluussisussaatitaasup oqarnera, illersuisup illuatungilerpaa. Pisullu nalaani angut inuusuttoq sumiiffimmi ungasinnermiissimasoq oqaatigalugu.

Savimmik kapoorinermut pinngitsuunerartoq

Aamma biilinut unittarfimmi allami savimmik machetemilluunniit saassussisimavoq.

Unnerluussissut naapertorlugu tamanna 31. august 2024-mi Nuummi, imerniartarfiup Daddy’s-ip silataani pivoq. Tassani angut qitermigut kapineqarpoq. Pisumut atatillugu 19-inik ukiulik nakuusersimasutut toqutseriarsimanngitsutullu unnerluutigineqarpoq. Taanna pinngitsuunerarpoq.

Unnerluussisussaatitaasup imerniartarfiup silataani pisut pingasunngornermi ullaap tungaani videoliarineqartut, takutippai. Inuit pineqartut nakkutilliisup assiliivianit ungasissumiipput, taamaattumillu malinnaaniarneq ajornakusoorsinnaalluni. Eqqartuussivimmi najuuttut pineqartoq iluamik takusinnaajumallugu isiginnaarummut qanillattorput.

Aallaasersornermi savimmik kapisinermilu saniatigut unnerluussummi aamma allanik arlalissuarnik unnerluutigineqarpoq, soorlu ikiaroornartumik hashimik tigummiaqarnermut, biilinik tillinnermut, aserorterinermut, pisortat atorfilittaanik kanngunarsaanermut, Nuummi neriniartarfimmi tillinniarnermut nakuusernernullu allanut.