Angut Ittoqqortoormiini toqutsisimasutut eqqartuunneqarpoq

AAMMA ATUARUK

27-nik ukiulik killisiorneqarnermini toqutsisutut nassuerpoq

Maanna Ittoqqortoormiini toqutsisoqarneranut eqqartuussineq naammassineqarpoq. Angut 27-nik ukiulik angummut 39-nik ukiulimmut aggustip 30-ani arlaleriarluni savimmik kapisimasutut unnerluutigineqarpoq.

Angut 27-nik ukiulik ukiuni arfineq-marlunni pineqaatissinneqarsimasunut inissiisarfimmiittussanngortinneqarpoq. Taamatut Kalaallit Nunaanni Politiini unnerluussisussaatitaasoq Lars Petersen Sermitsiamut paasissutissiivoq

Unnerluussisut piumasarisaattut eqqartuussutaavoq, ukiuni arfineq-marlunni pineqaatissinneqarsimasunut inissiisarfimmiittussanngortinneqarpoq, naak illersuisup pinngitsuutinneqarnissaa anguniaraluaraa.

Unnerluussisoq naammagisimaarpoq: Allaanerusinnaanngilaq

Immikkut unnerluussisup suliap inernera naammagisimaarpaa:

- Uppernarsaatit pineqartut eqqarsaatigalugit isumaqarpunga eqqartuussineq allatut inerneqartariaqanngitsoq.

- Aamma isumaqarpunga sukkasuumik pisoqarsimasoq, toqutsineq aggustip 30-ani pimmat maannalu eqqartuussut saqqummiunneqareersoq, Lars Petersen oqarpoq.

Unnerluutigineqartoq toqutaasoq fiisteqatigaa

Eqqartuussivimmi unnerluussisussaatitaasoq oqarpoq eqqartuussisut aalajangernerminni arlalinnik tunngavissaqartut.

Ilaatigut takunnittut uppernarsarpaat unnummi toqutsiviusumi eqqartuussaasoq toqutaasorlu fiisteqatigiissimasut, aamma peqataasut allat fiisternerup kingorna fiisternermut allamut ingerlaqqimmata taakku marluk kisimiillutik angerlarsimaffimmiiginnarsimasut.

Angut 39-nik ukiulik toqungasoq ullaaq taanna angerlarsimaffimmi tassani nassaarineqarpoq.

- Eqqartuussiviup aamma maluginiarpaa unnuami kingusinnerusukkut unnerluutigineqartoq inummut allamut naapitsimmat, taassumalu takusinnaagaa tujuuluaqqamik aammik mangiarneqarsimasumik atisaqartoq, taassumalu ima oqarfigimmani: ’Inummik toqutsigama,’ Lars Petersen oqarpoq nangillunilu:

- Taamatuttaaq angerlarami nukkaminut taama oqarpoq, atialu taallugu. Aappaattut tujuuluaqqamiittoq aak mangiarneqarsimasoq DNA aqqutigalugu misissorneqarnerani toqusup aagigaa uppernarsarneqarpoq. Aammattaaq atisat allat unnuk taanna atorneqartut aammik nassaarfigineqarput, taakkualu toqutaasup aagigai tikkuunneqarput.

- Kingullertut, politiinit apersorneqarnermini siullermi nassuerpoq nammineq taamaasiorluni.

Eqqartuussivimmi nassuerumanngitsoaq

Eqqartuussinermi paasinarsivoq unnerluutigineqartoq toqutaasorlu unnerluutigineqartoq meeraanerata nalaani najugaqatigiissimasut, toqutaasup unnerluunneqartup arnaa aappartaarsimammagu.

Eqqartuussivimmi unnerluunneqartoq oqaaseqarusunngilaq, eqqartuussissuserisuata oqarnera naapertorlugu unnuaq taanna eqqaamasaqannginnerarmagu. Aggustimili tigusarineqarami killisiorneqarnermini toqutsisimanerminik nassuerpoq.

Eqqartuussaasup eqqartuussutsip suliareqqitassanngortinnissaa eqqarsaatigeqqissaarsimavaa.