Angutit marluk toqutseriarsimasutut unnerluutigineqartut —  SAR-imik annaassiniarnerit marluk ingerlanneqartut

Nanortalimmi peqqarniitsumik pingasunngornermi nakuusertoqarpoq.

Angutit marluk pingajuminnik saassussisimasutut pasineqartut pingasunngornermi ullaakkut nalunaaqutaq 07.38  politiit kalerrinneqarput, politiit pigaartuisa pisortaat Poul Kreutzmann oqarpoq

Nakuusersimasutut suliaq aallaqqaammut politiinit aallartinneqarpoq, pisorli ilungersunarmat toqutseriarnertut ingerlateqqippaat. Pasineqartut marluk sisamanngorpat ullaap tungaani inatsit tunngaviusoq naapertorlugu killisiorneqassapput, unnerluussisullu pasineqartut tigummigallarneqarnissaannik kissaateqarput.

Poul Kreutzmann naapertorlugu pinerlineqartoq napparsimmavimmut unitsinneqarsimavoq.

SAR-imik suliaqarnerit marluk

Politiit annaassiniarnernik marlunnik pingasunngornermi unnukkut suliaqarput.

Siulleq Nuup eqqaani pivoq, tassani politiit Aasiaat Radioatigut nal. 20.28 nalunaarfigineqarput umiatsiaq pingasunik ilaasulik Nuup Atammiullu akornanni sinerissap qanittuani ikkarlummut aporsimasoq.

Politiit angallataat Ilik aallartinneqarpoq inuillu pingasut ajunngitsut annaanneqarput.

Umiatsiaq qulinik ilaasoqartoq Tasiilap eqqaani ajunaalernermik kalerrisaarisoq, politiinut nalunaaqutaq 22.40 kalerriutigineqarpoq.

Tassani qatserisartut angallataat aallartinneqarmat inuit qulit nunamut oqqunneqarput.

Pinngortitap ikuallanneri marluk

Pigaartut pisortaat nangilluni oqarpoq Sisimiut eqqaani nuna ikuallattoq suli qatserneqartoq.

Aamma pingasunngornermi Qaqortup eqqaani nuna ikuallalerpoq, tamatumanilu qulimiguulimmik qatserisoqarpoq.

Tamatumunnga atatillugu pigaartut naalagaat pinngortitami angalaartunut ima kajumissaarivoq:

- Innermik atuissagaanni mianersortoqartariaqarpoq, nuna panerpoq, taamaattumillu ikuallatsilernissaa ajornanngitsuaraalluni, Poul Kreutzmann oqarpoq.

Nunap ikuallannera pissutigalugu oqartussaasut aningaasartuuteqangaartariaqartut, oqarpoq.