Aningaasanut inatsit inissippoq – sipaarniuteqarujussuarnissaq attanneqarlunilu amerlanernik sipaartoqassasoq

Partiit naalakkersuisoqatigiit Naalakkersuisullu aappaagumut aningaasanut inatsit isumaqatigiissutigaat.

Aningaasaqarnermut naalakkersuisup Múte B. Egedep (IA) ataasinngornermi ullaap tungaani tusagassiortunik katersortitsinermini oqaatigaa.

- Aningaasanut inatsit pillugu siammasissumik isumaqatigiissuteqarnermut nuannaarutigaara, Múte B. Egede tusagassiortunik katersortitsineq aallarnerlugu oqarpoq.

- Kalaallit Nunaat aningaasaqarnikkut nutaamik inissisimaffeqalerpoq, partiillu aningaasaqarneq eqqarsaatigalugu akisussaassuseqarnertik takutippaat.

Naalakkersuisut partiillu naalakkersuisoqataasut siunissami aningaasaqarnerup qulakkeernissaa isumaqatigiissummi pingaartikkaat aamma oqaatigaa.

Partiit naammagisimaarinnittut

AAMMA ATUARUK

Naalakkersuisut millionikkaanik ima sipaaruteqassapput

Ukioq manna isumaqatigiinniarnerit nalaanni aningaasaqarneq ataqatigiissarniarlugu politikerit sipaarniuteqangaartsiartariaqarsimapput.

- Aningaasatigut unammilligassaqagraluarluta isorliunerusuniit illoqarfinnut nunatut ineriartornerput ingerlatiinnartariaqarparput, tamannalu aallavigalugu sulivugut, Múte B. Egede oqarpoq, nangipporlu:

- Aningaasanut inatsit oqimaaqatigiissarneqartussaammat ukiut tulliuttut aningaasaqarnikkut unammilligassaqassaaq. Aningaasanut inatsit oqilaaqatigiittoq pilersikkusupparput.

Tusagassiortunik katersortitsinermi partiit naalakkersuisooatigiit sinniisuinit peqataasut tassaappiut Mariane Paviasen (IA), Jørgen Rosbach (D), Erik Jensen (S) aamma Aqqalu C. Jerimiassen (A).

Partiit isumaqatigiissummi angusat nuannaarutigisatik saqqummiuppaat.

Erik Jensenip suliassaqarfiit ilaat naalagaaffimmiit angerlaanneqarnissaat sulissutigineqassammat partiimit nuannaarutigineqartoq oqaatigaa.

Aalajangersimasunik suliniuteqarnissamut aningaasat amerlanngitsut - sipaarniuteqarujussuarnissaq attanneqarpoq

Ukioq manna aningaasanut inatsisissatut isumaqatigiinniarnerit sipaarniuteqarfiungaatsiarput. Pisortat aningaasaqarnerat pitsanngorsaaviginiarlugu 800 mio. koruunit ukiuni tulliuttuni sisamani sipaarniutigineqassasut Naalakkersuisut saqqummiunnikuuaat.

Peqqinnissaqarfik, Inatsisartut kiisalu ineqarnermut attaveqaqatigiinnermullu tunngasut minillugit Namminersorlutik Oqartussat suliassaqarfii tamarmik sipaarfiginiarneqarput.

Taamaattumik aningaasanut inatsisissatut isumaqatigiissummi ukiuni sisamani tulliuttuni suliniutinut aalajangersiamasunut 7,3 millionit koruuniinnaat aningaasaliissutigineqarput.

Qanoq sipaaruteqavittoqassanersoq aningaasanngorlugu isumaqatigiissummi eqqaaneqanngilaq, attanneqassasorli eqqaaneqarluni.

Isumaqatigiissummi takussutissaq takuneqarsinnaavoq.

Københavnimi sinniisoqarfik sipaarniarfigineqartoq

Kalaallit Nunaata Københavnimi sinniisoqarfiani ukiumut 2 millionit koruuninik sipaaruteqarnissaq isumaqatigiissutineqartut annerit ilagaat. Sipaaruteqarneq ukiuni sisamani tulliuttuni 8 millionit koruuninik aallerfiussaaq.

Majoriaq 2027-miit 2029-mut 2 millionit koruuninik sipaarfigineqassaaq, taamaalillunilu 6 millionit koruunit aallerfiussalluni.

Aningaasat ilaatigut imminut pilersornissamut suliniummut ukiumut 1 millionit koruuninik aningaasaliinermut, kommuninillu nakkutiginninnerulernermut 2027-miit 2029-mut 1 millionit koruuninik aningaasaliiffigineqarput.

Unammilleqatigiinnermut aqutsisoqarfiup pisinermi tunisinermilu akinik ukiuni tulliuttani misissuineranut 1 millionit koruunit aamma aningaasaliissutigineqarput.

Kisitsisit 2026-mi nunap karsiata missingersuutai katillugit 8 milliardit koruunit missaanniinnissaat eqqarsaartigalugit paasineqassapput.

 Aningaasanut inatsimmut isumaqatigiissutigineqartumi aningaasaliissutit allannguutaat sunut tunnganersut takussutissani ataani takuneqarsinnaapput:

Inatsisartuni aningaasanut inatsisissap suliarineqarnerani pilersaarutit malillugit tallimanngorpat pingajussaaneerneqassaaq.