Anorersuarnissaa pissutigalugu juullimi angallanneq allanngortinneqarpoq

Nuummi sapaammi 30 m/s tikillugit anoraasuartartussamik anorersuarnissaanik aarlerisaarisoqarnera pissutigalugu Air Greenlandip 21. december angallassinissani taamaatillugit allanngortittariaqalerpai.

Angalatitsivik nittartakkamini ilisimatitsivoq timmisartuussinissat ulluni ataasinngornermi decembarip 22-ani marlunngornermilu decembarip 23-ani ingerlanneqarnissaat sulissutigineqartoq.

Angallannermut aqutsisoqarfiup Air Greenlandip Nuummi mittarfimmi timmisartunik ingerlatsisinnaanera ukiaq allanngortippaa, nalunaaquttaq akunnerani ataatsimi tikittut aallartullu killilerneqarlutik:

Juullernissaanut inissat tamarmik atorneqartut

- Nuummi isumannaallisaanermi killilersuinerit peqqutaallutik, piffissami tassani taamaatitsinerit kingunerisaanik aallartussat amerlassusii killiligaapput. Taamaattumik angalanissaq allannguuteqarpat allannguut akuerinissaa kaammattuutigaarput, timmisartuussinerit killeqarmata. Peqqutaasoq Air Greenlandip sunniuteqarfigisinnaasaasa avataanniippoq, Air Greenland allappoq.

Angalasussat angalanissamut pilersaarummik nutaamik tunineqassapput. Angalasut unnuinermi inissinneqarnissamik pisariaqartitsisut Air Greenlandip immikkoortortaqarfianut attaveqaqquneqarput.