Arnap viinni neqilu tilleriaraluarai

Sisimiuni unnuaq pisortat illuutaannut arlaleriarluni tillinniartoqarpoq.

Akileraartarnermut aqutsisoqarfiup allaffeqarfiani igalaaq aserorneqarsimasoq, katersugaasivimmi igalaaq aserorlugu aamma ammarneqarsimasoq politiit nalunaaqutaq 03.20 nalunaarfigineqartut, kiisalu kommunip innuttaasunik sullissivianut aamma tillinniartoqarsimasoq nalunaarutigineqartoq, politiini pigaartut pisortaat Thomas Jeppesen oqarpoq.

Aammattaaq Qaqortumi Brugsenimi pingasunngornermi nal. 12.15 tillinniartoqarneranik politiit nalunaarfigineqartut, pigaartut pisortaat oqarpoq.

Tassani arnap viinni neqilu katillugit 759 koruuninik naleqartut qarliminut toqqorsimavai, akiliinanilu pisiniartitsisoq qaangiinnariaraluarsimallugu.

Tillinniarnerli paasineqarpoq, arnarlu tillissimasutut unnerluutigineqarluni.

Naggataatigut pigaartut pisortaata Aasianni nal. 20.14 pisimasoq oqaluttuaraa, tassani angut politiimut qitserarmat oqartussaasumut killissamik qaangiisimasutut unnerluutigineqarpoq.

Politiit aalakoorluni biilertup tigusariniarnerani tamanna pivoq.