Atassut Naalakkersuisunngortussamik innersuussisoq
Atassutip siulersuisui Maritha Broberg Naalakkersuisunut ilaasortassatut innersuutissallugu aalajangerput.
Naalakkersuisut marsip 28-ani saqqummiunneqarput. Naalakkersuisunut ilaasortat marluk ukiaq manna tunuarput, tassappullu Bentiaraq Ottosen (A) aamma Mads Pedersen (IA).
Assi: Hanna Hviid
Partiip naalakkersuisoqataasup Atassutip Naalakkersuisuniit novembarimi tunuartup Bentiaraq Ottosenip taartissaa toqqarpaa.
Siulersuisut Maritha Broberg siulittaasussatut toqqarsimagaat, partii Facebookimi naatsumik allappoq.
Maritha Broberg Qeqertalik Kommunimi kommunalbestyrelsimut maanna ilaasortaavoq, tassanilu Atassut sinnerlugu kisiartaalluni kommunalbestyrelsimut ilaasortaalluni.
Inatsisartunut kommunimullu upernaaq qinersinermi qinigassanngortippoq, Inatsisartunullu qinigaanngikkaluarluni partiip sinniisussaanut ilannguppoq.
Inatsisartunit akuerineqassasoq
Bentiaraq Ottosen nittartakkatigut sulisussarsiorfik nutaaq aningaasaliiffigineqanngitsoq pissutigalugu Naalakkersuisunit tunuarpoq. Isumaginninnermut, suliffeqarnermut, nunamut namminermut avatangiisinullu naalakkersuisuugaluarpoq.
Naalakkersuisoqarfiit taakku Naalakkersuisunut ilaasortanit allanit maanna akisussaaffigineqarput. Maritha Brobergip taakku akisussaaffigilissanerai suli paasissutissiissutigineqanngilaq.
Naalakkersuisutut innersuunneqartut Inatsisartunit akuerineqaqqaartarput, tamannalu Inatsisartut ukiaanerani ataatsimiinnerat naammassiniarlugu februaarip pingajuanni katersuuteqqippata pissaaq.
Taarseeqqinneq
Inatsisartut naalakkersuisup Mads Pedersenip tunuarnissaa februaarip pingajuanni aamma akuerissagunarpaat.
Naalakkersuisut siulittaasuata Mads Pedersenip tunuarniuteqarnera akueraa, Naalakkersuisunili ilaasortaq tunuartinnagu inatsisit naapertorlugit Inatsisartuni akuerineqaqqaartussaavoq.
Mads Pedersen Inuit Ataqatigiit sinnerlugit naalakkersuisunut ilaasortaagaluarpoq. Mads Pedersen Naalakkersuisuini kia taarsissaneraa suli nalunaarutigineqanngilaq.
Naalakkersuisut siulittaasuata Jens-Frederik Nielsenip Mads Pedersenip akisussaaffii, tassa meeqqat inuusuttullu, ilaqutariinnut nunamullu namminermut tunngasut, maannamut akisussaaffigai.
